Edwards-a'n Usman a barakhaih

Nimin zing khan Salt Lake City, Utah-ah UFC welterweight title inchuhna neih a ni a, Britain mi Leon Edwards chuan Nigerian fighter ṭha Kamaru Usman chu a knockout.

Round lina thlengin Usman a chungnung a, kum 35 mi 'Nigerian Nightmare' an tih mai hian record pawh a nei ṭha. UFC fight vawi 15 a hmachhawn tawhah chak loh a la nei lo a, Edwards pawh hi ṭum hnih a hneh tawh.

Amaherawhchu round nganaah Edwards hian a kut vei lama hnek tum ang takin a awm a, Usman hian bum tumin a lu dinglamah thle mah se bumin a awm ta zawk. Edwards chuan ke vei lam chuan chiang takin Usman a luah a pet a, 'Nigerian Nightmare' a tlu chiang hle.

Edwards hi Michael Bisping (2016) hnua British mi champion leh thei hmasa ber a nih bakah champion thei pahnihna a ni bawk.

Jamaica-a piang Edwards hi rinkai lo zawk ni mah se khawvel barakhaihin welterweight title a kawl ta. Edwards chuan, "Min ringhlel a, ka theih loh tur thu in sawi. Dinhmun chhe tak aṭangin ka rawn seilian a, min ring lotu pawh an tam. Mahse tunah chuan min en ta che u," tiin chhuang takin a 'belt' chu a pholang.

Edward hi kum 13 mi a nihin a pa an thahsak a, Birmingham-ah misual rual zingah a tel. Amaehrawhchu mixed martial arts hmangin nun thar a chhar a, khawvel hriat hlawh.

Kum 30 mi Edward chuan, "Jamaica-ah engmah nei loin ka piang a, thinga sak in, a chung rangvaah ka khawsa ṭhin. UK aṭangin belt a chawi theih tih ka sawi lawk ang kha a thleng ta.

"A hmasain Pathian chungah lawmthu ka sawi. Ka nu, ka hmangaih che. Ka nun thlaktu i ni a, ka sawi ang ngeiin ka thil tiam che chu ka hlawhchhuah sak che," tiin lawm thu a sawi.