Dan rual loh Arsenal an kal zel
Thla 12 liam ta kha chuan - Arsenal hi Premier League team 20 inel zinga a hniam ber an ni, 'EPL aṭangin Arsenal an tla dawn' tih chu club dangten Gunners ṭantute an fiamna leh ṭawng khum duh dan a ni.
Hun a inher hret a, tunah chuan engkim a danglam ta. Mikel Arteta naute hian a zawnin Premier League match thumah hnehna an chang a, 2004-05 season hnua bul an ṭan fuh ber ṭum niin table chung berah an awm.
North London club hian Inrinni zan khan captain Martin Odegaard-a goal hnih leh, defender William Saliba goal hmangin Bournemouth 3-0 in an hneh. Mitthlaah kum 2005 a lang nghal, hemi season hian pahnihna ni chungin hun tawp an hmang.
Laipui a puak
Sean Court-a inkhelah goal kan hmu hma, forward Gabriel Martinelli-a shot chu Bournemouth keeper Mark Travers chuan lo dansak mah se, ball per hi Odegaard-a'n harsatna nei loin a khung, minute ngana lekah mikhual lamin goal an nei der.
Bournemouth an insiamrem hman lo, minute 11-naah Odegaard bawkin chiang zetin a hlap lut a, second half-ah defender Saliba chuan Granit Xhaka pek chu kual mawi zetin a hlap lut a, nuamsa takin point thum an hlawh chhuak.
Arteta-a'n hun tawp dawn lamah Eddie Nketiah leh Emile Smith Rowe te tan hun a siamsak, English player pahnih hian keeper Travers tan hna hautak siamsak mah se goal dang erawh an khung belh thei tawh bik lo thung.
Jesus telna
Manchester City aṭanga an lakluh Gabriel Jesus-a'n danglamna a thlen chhunzawm zel. Brazilian striker hian an goal hmasa ber luh dawnah tha a thawh hlawk, ball kang lai a lak thlak hnuah a tlanpui a, defender pahnih paltlangin Martinelli tan ball a siamsak.
Goal hnihna pawh a ke aṭanga chhuak a ni. Forward Bukayo Saka ball pek chu shot theih turin a lo dawng a, ball hi a shot hmain Odegaard rawn langin a kian ta zawk. Jesus hian goal pawh a khung, mahse VAR hman a nih hnuah an hnawlsak thung.
Arsenal tan Jesus-a'n Premier League match thum a khel a, goal hnih a khung bakah assist vawi thum a nei der tawh. Hliam nei loa a khel zel thei a nih chuan North London club hi sang tak a thlenpui theiin a rinawm.
Arteta a lungawi
Arsenal manager Mikel Arteta chuan, "Bournemouth khelmual hi inkhelh awlsamna hmun a ni lo, 3-0 a hnehna chan theih chu result ṭha tak a ni. Aston Villa nen an inkhel kha kan en a, chuvangin team ṭha an ni, anni kan hneh theih avangin kan hna kan thawk ṭha tihna.
"Premier League hmahruaitu nih theih chu a lawmawm, chu tih rualin match thum chauh kan la khel tih hriat a ṭha. Team dang pawh kan dinhmun anga rawn ding nghal thei an awm tih kan hriat a ngai, a pawimawh ber mai chu inrintawkna nena kan khel thei kha a ni," a ti.
Gunners hi season hmasa khan August thla chhungin an tlawm vek a, goal pawh an khung lo. Kuminah erawh match thum an chak a, goal kua zet an khung. An match lehpek atan Emirates Stadium-ah Fulham an mikhual ang.