Casemiro tel lohna Real an vul

Real Madrid-in Casemiro tel loa La Liga an khelh hmasak berah Celta Vigo 4-1 in an hneh. Carlo Ancelotti hote hian minute 14-naah goal an khung ṭan a, an khelh dan thlirin jersey no. 14 ha ṭhin Casemiro awm lo pawh ni se an buai phah lo tih a lang.

Balaídos-ah ball-in Celta player kut a per zarah penalty an hmu a, Karim Benzema-a'n a khung. Real defender Eder Militao-a'n penalty a chawi a, Iago Aspas-a'n mawhphurhna rawn lain goal kilah lei hrulin ṭha zetin a pet a, 1-1 a ni.

Mikhual team-in first half-ah vek hma an hruai a, Luka Modric thiamzia hmuhin a awm. Kum 36 mi Modric hian ṭha taka a lakluh hnuah box pawn aṭangin goal kilah tak a khung - Celta keeper Agustín Marchesín tan dan rual a ni lo.

Second half-ah pawh Real player-ten theihna an nei sang tih a lang nawn. Minute 56-naah Vinicius Jr chuan Modric hnen aṭanga a ball hmuh chu ama umphak tur thoin a la per dawrh a, goalkepeer paltlang turin a thiamthil a lantir a, goal ruakah a khung.

Minute 66-naah Real tan Federico Valverde-a'n goal lina a khung a, goal dang khung belhna remchang pawh an nei. Hun tawp hma hretin Real-in penalty an hmu leh a, Eden Hazard-a pet chu keeper Agustín Marchesín-a'n a dansak.

Los Blancos hian 4-1 in hnehna an chang. Midfield-ah Modric, Eduardo Camavinga leh Aurelien Tchouameni ten bul an ṭan a, squad-ah Toni Kroos awm lo mah se bench aṭangin Eden Hazard, Marco Asensio leh Dani Ceballos te an la lut thei a, Casemiro tel lo pahwin an squad a la ṭha tawk hle.

Real manager Carlo Ancelotti chuan, "Tchouameni hi Casemiro nen an theihna a inang lo a, Celta Vigo lakah training-naa a khelh ṭhin dan angin a khel. Goal venhim kawngah a che ṭha a; Modric, Camavinga leh Valverde te an awm bawk avangin nuamsa takin a khel thei a ni," tiin a sawi a, goal khungtu Modric chu a bik takin a fak bawk.

August 20, Inrinni
Espanyol 0 - 2 Rayo Vallecano
RAY : Isi Palazon 40'; Pathe Ciss 59'
Sevilla 1 - 1 Valladolid
SEL : Karim Rekik 86'
VAL : Anuar Mohamed Tuhami 80'
Osasuna 2 - 0 Cadiz
OSA : Ezequiel Avila 37' (P); Kike Garcia 79' (P)
Mallorca 1 - 2 Real Betis
MAL : Vedat Muriqi 56'
REB : Borja Iglesias 9' (P), 73' (P)
Celta Vigo 1 - 4 Real Madrid
CEL : Iago Aspas 23' (P)
RMA : Karim Benzema 14' (P); Luka Modric 41'; Vini Jr 56'; Fedrico Valverde 66'

Zanin Inkhel Tur
Girona 1:30 AM Getafe