Injury time-ah Bremen-in Dortmund an lehthal

Bundesliga-ah inlehthalna ropui a thleng. Borussia Dortmund-in minute 88 thleng Werder Bremen lakah 2-0 in hma an hruai a, hun tawp dawnah thilmak a thleng. Mikhual Bremen-in minute 89-na aṭanga siphurh sut ṭanin injury time minute nganaah Oliver Burke-a'n chakna goal a khung.

Edin Terzic hnuaiah Dortmund-in bul an ṭan ṭha a, season liam ta nen chhiar telin match kaw chhung an chak zawn tawh. Signal Iduna Park-ah Dortmund-in first half injury time-ah Julian Brandt hmangin an khung hmasa a, Raphael Guerreiro hmangin minute 77-naah an khung belh.

Minute 89-naah Lee Buchanan-a'n ball per chhuak chu mawi zetin goal kilah ṭha zetin a pet goal. Dortmund an talbuai zui a, Niklas Schmidt-a'n minute thum hnuah mawi zetin goal kilah a tauh lut.

Minute nga hun pek belh a ni a, Nottingham Forest aṭanga inchher chhuak Oliver Burke-a'n thilmak a thlentir. Kum 25 Burke hian a ball hmuh chu ṭha taka tlanluh puiin ṭha zetin chakna goal a khung, Dortmund ṭantuten mak tiin thil thleng chu an thlir.

Bundesliga inkhel dangah Union Berlin-in RB Leipzig 2-1 in an hneh a, Hoffenheim-in 3-0 in Bayer Leverkusen an sawp. Nizan khan Bayern leh Vfl Bochum te an inkhel a, result kan hre hman lo.