Fulham chakna Mitrovic

Craven Cottage-ah Fulham-in minute 90-naa Aleksandar Mitrovic tauh luh hmangin West London derby-ah Brentford 3-2 in an hneh hram. London club hian bul an ṭan ṭha a, Bobby Reid leh Joao Palhinha te hmangin 2-0 in hmahruai mah se Bees-in Christian Norgaard leh Ivan Toney te hmangin an sut.

Fulham-in chhantu an mamawh a, mamawh chhanna chu Mitrovic a ni. Serbian striker Mitrovic hian match hmasa lama Wolves nen goal awm loa an inhnehtawk ṭumin penalty a hlah a, Bees lakah erawh chesual nawn loin goal pawimawh a khung.

Kum 27 mi Mitrovic hian season liam ta khan Championship-ah record siamin goal 43 tehmeuh a khung a, Premier League-ah chet ṭhat chhunzawmin match thumah goal thum a khung. Fulham hian match thumah point nga hmuin hneh loh an la tawng lo a, coach Marco Silva erawhin tun aia ṭha an la khelh theih thu a sawi.