MBA Junior Official Championship 2022

Mizoram junior category bika badminton inelna lian ber, ngaihhlut hlawh ber leh pawisa tamna ber, MBA Official Championship - Junior 2022 chu August 19, Zirtawpni khan a hmawr bawk a ni ta.

Bazar Veng Community Hall, Lungleiah inelna hi August 19 khan neih ṭan a ni a, Lunglei District Badminton Association (LDBA)-in inelna hi thlengin, Under-11 aṭanga Under-19 inkar category hrang hrangah inelna hi neih niin, player 216 ngawtin inelna hi an hmachhawn a ni.

Players heti zat pungkhawm zingah Chanmari West rawlthar H. Lalṭhazuala chu triple champion niin, a hming a langsar hle - Pullela Gopichand Badminton Academy, Hyderabad-a training nei lai Ṭhazuala hian Under-17 Boys' Singles, U19 Boys' Singles leh U17 Boys' Doubles-ah te champion nomawi a chawi a, kum 15 leh thla khat mi shuttler hi Badminton Association of India (BAI) ranking thar berah chuan, U17 BD-ah ranking 5-na niin, U19 BS-ah 28-na a ni a, U-19 BD-ah 21-na a ni mek bawk.

Hetihlai hian hmeichhe lamah Abigail Lalṭhazuali hming bawk lam nawn a ngai - MBA Senior Official Championship 2022-a Womens' singles champion zo hlim hi U19 Girls' Singles leh U19 Mixed Doubles-ah a champion a, Saron Veng tleirawl hi ITM University Badminton Academy-a inzirlai a ni.