Rose-a'n Jose Mourinho a fak

Tottenham defender Danny Rose chuan London club-a an coach thar Jose Mourinho a fak a, Portuguese manager chu hnehna chang ṭhin coach a nih thu sawiin FA Cup lamah a mit a len tur thu a sawi. 

Spurs hian kum 12 zet chu nomawi an chawi­ tawh lo a, khawvela coach hlawhtling ber pawl Mourinho hian he nomawi hi chawi ngei a duh dawn. 

FA Cup third round replay chu zanin dar 1:15-ah khelh a ni dawn a, Tottenham hian Middlesbrough an mikhual ang. London club hian Cham­pionship khel mek team hi match hmasa zawkah 1-1 in an inhnehtawkpui a, replay khelh a ngaih phah. 

Rose chuan, "Mou­rinho hi nomawi chawi ṭhin coach a ni tih chu mi zawng zawngin an hre vek a, a kalna apiangah nomawi a chawi thei zel tih hi thudik a ni. 

"Boro lakah hnehna chang thei ngei tura a ngaih team a rem ngei ang tih ka chiang a, FA Cup nomawi hi chawi duhin a thlir ang tih pawh ka ring tlat a ni," a ti. Liverpool laka 1-0 a tlawm hlim Spurs hi hliam vangin an talbuai mek a, player langsar tak tak Harry Kane, Hugo Lloris, Moussa Sissoko, Ben Davies leh Tanguy Ndombele te chu an chhawr thei lo mek.  

English football-a inelna ngaihhlut hlawh ber pawl FA Cup third round replay zanina inkhel tur­ah hian Premier League club Newcastle United leh Watford te pawh an inlan dawn.

FA Cup third round replay

Zanin Inkhel Tur

    Newcastle United    01:15 AM    Rochdale

    Shrewsbury Town    01:15 AM    Bristol City

    Coventry City    01:15 AM    Bristol Rovers

    Blackpool    01:15 AM    Reading

    Tranmere Rovers    01:15 AM    Watford

    Tottenham Hotspur    01:35 AM    Middlesbrough

January 15, Nilaini Zan

    Manchester United    01:15 AM    Wolverhampton

    Carlisle United    01:15 AM    Cardiff City