Tlai ni nemah Aizawl West Derby ; Dinthar tan Nigerian midfielder inlan dawn

Lalbiakliana Memorial MFA Super Cup quarterfinal-ah vawiin tlai dar 1:30 hian MPL club Chanmari West FC leh Dinthar FC te an inkhel dawn a, Lammual inkhel hi Zonet chuan live-in a pe chhuak dawn a ni.

Maimawms-in semifinal thlen ngei tumin an Nigerian midfielder Clarence Carter Ezebube an thawhchhuah pui dawn a, Shillong Lajong aṭanga West Warrior zawmtu Jacob Lalrawngbawla nena an intawng tur hi a en tham ang.

West Warrior
Chanmari West FC hi kumin CYMA Football-a champion Ramhlun South nen sawi zawm theih an ni a, an match hnuhnung bera Zauva Memorial FC 15-0 a an sawp ṭumin Ramhlun South tlangvalten goal 14 zet an khung.

CYMA Football zawhah MFA Super Cup khelh chhunzawm nghal a ni a, HC Zarzoliana naute zingah Ramhlun South tlangval an tam avangin an inhrechiang nghal a, Dinthar FC-in foreigner la nei lo se chuan rinkai zawk tur an ni.

Captain Lalnunmawia'n match hnuhnung berah goal nga a khung a, tun inelnaah goal 9 khung tawhin uluk bik a ṭul ang. West Warrior hian Mawitea nau Vanlalthlamuana leh C. Lalrem­ruata te goal khung turin an nei a, midfield-ah Jacob leh Lalromawia te an awm bawk avangin tlarhma lam an ngaihtuah awm loh.

Tlarhnung lam erawhin fiahna tak tak an la hmachhawn lo a, Lungleia innghat SYS FC Aca_demy an hmachhawn ṭuma goal an chhuah tih loh chu goal dang an la chhuah lo - vawiin hi an fiahna an hmachhawn hmasak ber tur a ni.

Maimawms

Dinthar FC-in MFA Super Cup-ah goal an la chhuah lo a, Aizawl DFA hnuaia division pathum club Chaltlang FC (2-0), 1st Bn MAP Academy (4-0) leh Ramthar Veng FC (3-0) te hma­chhawnin goal kua an khung. Maimawms hi an khingpui thlir­in goal an la khung tam tawk lo a, amaherawhchu Nigerian midfielder Clarence Carter-a'n a rawn belh dawn avangin an goal nawr a na sawt ang.
Maimawms coach Lalhlupuia Sailo chuan, "Tawnhriat nei player ka luhtir ang. Chak ngei kan tum," tiin Vanglaini a hrilh a, Dinthar FC hian an match hnuhnung bera third division club an hmachhawn ṭumin an player ṭhenkhat an awltir a ni.

Chanmari West FC pawhin an match hnuhnung ber aia ṭha zawka khelh an tum dawn a, coach HC Zarzoliana chuan, "Zauva Memorial FC nen kha chuan kan intum tawk lo deuh a, kan player-te'n inkhel an la thu tak tawk lo. Tunah chuan MPL club kan tum tawh dawn a, kan theihna zawng zawngin kan khelh a ṭul a ni," tiin a sawi ve bawk.