Champions League khelh duh Sanchez

Nimin thleng kha chuan Alexis Sanchez hma hun tur chu 'engmah a la chiang lo' tih chauh hi thu chiang a ni. Arsenal forward hian Champions League khelh a duh thu a sawi a, chutihrualin a contract neih lai chu a club kuta awm a nih thu a sawi lang tel bawk.

Chile international Sanchez hian Confede­rations Cup a khelh avangin China-a Gunners tour pawh a la zawm ve lo a, amah duhtu langsar Bayern Munich chuan lakluh an tum tawh loh thu an tichiang. A chhuak dawn a nih chuan an elpui Manchester City chu a pan tura hming langsar a ni.

Kum 28 mi Sanchez chuan, "Ka naupan laia ka duhthusam ṭhin chu Champions League khelh leh champion a ni a, tun thlengin a la ngai reng," tiin chawlh a hmannaah Chile Radio a hrilh.

North London club tana season hmasaa goal 30 khungtu Sanchez hian Emirates Stadium-ah kum khat daih bak contract a nei tawh lo a, tun thlengin a la pawt sei lo. Tun nipui emaw January thlaah emaw a chhuak a nih loh chuan man nei loin a duh lam a hawi thei dawn tihna a ni.

Barcelona forward hlui chuan sawi chhun­zawmin, "Ka hma hun chungchanga thudik awm chu ka kutah a awm lo tih hi a ni. Thutlukna chu ka siam tawh a, tunah chuan Arsenal kut­ah a awm tawh. Club-in engtiangin nge hma a lak dawn tih hi ka ngaichang mek," a ti.

Arsenal manager Arsene Wen­ger-a'n Pre­mier League lama an elpui hnenah an player ṭha an chhuahtir tawh loh tur thu a sawi chiang tawh a, Bayern an inhnuhdawh hnuah Sanchez hi Man City nen sawi zawm a ni mek. Wenger hian a player hman thiam sa hi a chelh thei a nih chuan club dang aṭanga player thar manto taka lakluh tluk zetin a lawmawm ang.

Gunners manager Wenger chuan, "Sanchez hi a cham ang, text message hmangin kan inbia a, thu lawmawm lam hlir a ni. Tun thleng chuan thu lawmawm loh lam a la awm lo," a ti. Season hmasa nipui lai khan Wenger hian a player hi Copa America a khelh avangin chawlh a pe rei bik tawh bawk.