Police kan hneh thei - Mala

Aizawl FC Academy coach K. Malsawmkima chuan an senior team hnehtu Mizoram Police an hlauh loh thu Vanglaini a hrilh a, hneh ngei an tum thu a sawi tel bawk.

Lalbiakliana Memo­rial MFA Super Cup-ah AFC Academy-in quar­terfinal thleng turin MPL club Ramhlun North an hneh a, vawiin chawhma dar 11:00 hian Mizoram Police an hmachhawn ang.

Team ngai

AFC Academy-in Ramhlun North an hneh ṭumin hrem vang­in defender pahnih Lal­ram­tiama leh Ricky Rohmingliana te an hmang thei lo a, vawiinah chhawr theih ni tawh mah se coach Mala'n MPL club hnehtute chungah rinna nghah a tum.

Mala chuan, "Ram­hlun North kan hneh ṭuma player ngai bawkin bul an ṭan dawn. MPL club lakah an khel ṭha a, duhsak an phu a, MPL club dang Police hneh leh turin an ṭha tawk a ni. Ka nauten inzir nan hmang se ṭul lo taka hnawhchhuah hi ka duh lo," tiin Vanglaini a hrilh.

Chak tuma an khelh tur thu sawi chhunzawmin Mala chuan, "Police game hnuhnung ber kha ka en a, thiam ang tawkin kan inzir a, chumi mil chuan ruahhmanna kan siam ang. Kan senior team an hneh vangin kan rilru put hmang a dang phah lo a, phuba lak lam kan ngaihtuah lo. Kan tum zawk chu semifinal thlen a ni," a ti.

Aizawl FC Academy hian CYMA Football khelh zawh taka top scorer PC Lalhriatpuia an kawl a, Ramhlun North penalty pet vawi thum dan saktu keeper Lawmsangzuala'n hmabak a nei êng a, rawlthar duhawm leh tha za rual awmkhawm hi Police tan vanduai theihna tur an ni.

Police lam hi

Mizoram Police-in I League champion Aizawl FC an hneh tawh a, Ramhlun North aia AFC Academy an hmachhawn thei hi an lawm khawp ang.

Police-in goal nawrtu player an neih ṭhat avang­in chak tura ngaih an ni a, amaherawhchu tlarhnung leh tlarhma lam an la inzawm fuh loh avangin goal an chhuah a nih chuan talbuai thei an ni.

Mizoram Police coach Ṭial­thawnga chuan, "Ai­zawl FC kan hneh ṭum khan tihsual kan nei a, chutihrualin sawi ang veka khelh hi chu a har a, kan khingpui an ṭha tih hriat tel a ṭul bawk. Ka naute khelh danah ka lungawi a, semifinal erawh kan la thleng lo. AFC Academy hneh tur hian theihtawp kan chhuah a ṭul a, inthlahdah thei kan ni lo," tiin fimkhur a ṭul thu a sawi ve bawk.