Chhinga Veng - Nuam Nuam Nuam First division club Venghlui FC-in semifinal an lut

Lalbiakliana Memorial MFA Super Cup-a semifinal lut hmasa ber chu Chhinga Veng FC an ni. Chhingcows hian Bethlehem Vengthlang FC goal khatin an hneh a, Lammualah Chhinga Veng mipuiin 'nuam nuam nuam' tiin an au rual leh thei ta.

Lalsangzuala Hmar hote hi Durtlang Leitan FC hnehtu Venghlui FC nen July 21, Zir­tawpni chhun dar 11:00-ah an inhmachhawn dawn a, MPL club hi first division club lakah final lut tura rinkai an ni.

Goal khat a tawk
Chhinga Vengin inhliam vangin R. Lalawmpuia (Ma­puia) an chhawr thei lo a, hei vang hian tlarhnungah captain Lal­rin­chhana kawppui turin K. Lal­thlahlova (Patea) chu luhtir a ni.

Champhai Zotlang tlangval Patea hian match hnuhnung bera Chawnpui FC an hmachhawn ṭumin bench aṭanga lutin goal a khung tawh a, Bethlehem Vengthlang nena an inkhelh ṭum hian goal awmchhun a khung.

Chhinga Veng defender Patea hian minute 37-naah Laldampuia corner pet chu a tauh goal a, hei hi minute 90 chhunga goal lut awmchhun a ni.

MPL club intluktawk
I League champion Aizawl FC chuan an match hmasa berah MPL club champion Chanmari FC chu penalty-ah an hneh hram a, MFA Super Cup champion lai AFC hi Mizo­ram Police-in 4-3 chauhin an hneh ve bawk.

Nimin inkhelah pawh hian transfer laia thawm nei lian Chhinga Veng an chungnung bik lo a, hun chanve hma lama inkhel thununtu chu Bethlehem Vengthlang an ni. Chawngthansanga hote hian ṭan phat aṭangin Chhingcows hi an nawr nghal a, an finishing a ṭhat tawk loh an tuar a, Chhinga Veng keeper Zothanmawia a khel ṭha bawk.

AFC keeper hlui T. Mawia hian second half-ah Edenthar-a volley ṭha zet chu mak takin a dang per hman a, hemi per chang fuhtu Hualngohmun tlangval Vanlalthanga'n a club hlui lamah a khung thei lo.

Chhinga Veng pawhin goal hnihna khung belh theihna tur hun ṭha an nei a, a club hlui lakah Lalrammuanpuia a che ṭha tawk lo a, Malsawmfela leh substitute MS Dawngliana te goal hmaah an hriam tawk lo bawk. Chhingcows-in hnehna an chang a, minute 90 chhunga an khelh dan thlirin inchhuang thei an ni lo.

Fak phu Chhinga Veng
Chhinga Vengin nomawi duhin sum an seng nasa a, mipui pawhin player ṭha rual hi an ṭawiawm ṭha bawk.

Nimina hnehna an chan zawh hian Chhinga Veng ṭantute chuan an ṭhutna Zomuanthanga Stand chu an tifai nghal a, entu mipuiin an sulhnu an tihfai nghal zel chuan Lammual fai zawk a awm thei ang.

Goal khung thei Venghlui
Nimin inkhel hnuhnung zawkah Durtlang Leitan-in Venghlui FC lakah Ramsang­liana hmangin minute 12-naah hma an hruai a, first division club chhaih kawlhtu chauh a ni.

Venghlui FC goal khung khawl Vanrammawia Ngente-in minute 16-naah tun inelnaa a goal 9-na a khung a, hemi hnu hian SN Hmasie leh K Roluahpuia ten goal hnih ve ve khungin Joseph Lal­­chhandama leh C. Zo­hmingthansanga ten goal khat ve ve an khung belh bawk.

Venghlui FC-in third divi­sion club Durtlang Leitan 7-1 in an sawp a, season liam taa quar­terfinalist hian kumin inelna­ah semifinal an thleng a, MFA Super Cup-a an record hi a ṭha hle.

Nimin Inkhel Results
Chhinga Veng FC 1 - 0 Bethlehem Vengthlang FC
CVFC : K. Lalthlahlova (Patea) 37'
Durtlang Leitan 1 - 7 Venghlui FC
DUR: Ramsangliana 12'
VEN : Vanrammawia 16'; SN Hmasie 26', 84'; K Roluahpuia 28', 89'; Joseph Lalchhandama 90'; C Zohmingthansanga 90+2'