China lamah Arsenal leh Bayern

Season thar inbuatsaih nan European club lian ten khawmualpui hmun hrang hrang an tlawh kual mek. Arsenal pawhin China an pan a, vawiin tlai dar 5:00 hian Bayern Munich nen Inter­national Champions Cup an khel dawn - inkhel hi Ten 2-ah en theih a ni ang.

Arsene Wenger-a naute hian Aus­tralia-ah match hnih an khel zo chiah a, an match hnuhnung zawka goal hmahruai khungtu Olivier Giroud chuan a tan chona thar a nih thu a sawi.

Arsenal striker Giroud chuan, "Tun hmain Asia-ah kan kal fo tawh, Japan, Vietnam leh Indonesia te pawh kan tlawh tawh. China erawh ka vawi khat kalna a ni a, ka tan chuan chona thar phurawm tak a ni," tiin a sawi.

Gunners hian tun nipui transfer chhunga an lakluh thar France striker Alexandre Lacazette leh Bosnia interna­tio­nal defender Sead Kolasinac te an enchhin mek zel a, Shanghai-ah pawh hian Bayern leh Chelsea an hmachhawn hunah an hmel kan hmu zui ngei tura ngaih a ni.

Season hnih daih contract ziaktu Wenger-a'n a squad thuam chak a la tum tih a chiang. Chutihrualin a hna a awlsam dawn lo, AS Monaco aṭanga an lakluh tum Thomas Lemar chu lak tumin dawr mah se French club lamin an chhuah phal rih lo.

Ligue 1 champion Monaco hian an midfielder Tiemoue Bakayoko chu Premier League champion Chelsea hnenah an chan a, an player pawimawh hloh belh an tum tawh rih loh thu an sawi.

Bundesliga champion Bayern Munich pawhin Thawhṭanni khan China khawpui Shanghai an thleng a, player thar Corentin Tolisso leh James Rodriguez te pawh an tel. Captain Manuel Neuer chu a ke hliam vangin a la inkhel thei dawn lo a, forward Thomas Mueller chu captain a ni chhunzawm ang.

Bayern coach Carlo Ancelotti chuan a player thar chungchang sawiin, "Real Madrid-ah khan James hi ka hrechiang tawh, khawvela a ṭha berte zinga mi a ni. Asia-ah hian kan system a thiam bel hman kan beisei," a ti.

Bayern hian season thar inbuatsaih nan hian Arsenal bakah AC Milan (July 22), Chelsea (July 25) leh Inter Milan (July 27) te an hmachhawn dawn a ni.