Lukaku-a'n goal a khung ta

Manchester United chuan Rio Tinto Stadium, Utah-ah Real Salt Lake 2-1 in an hneh a, pound maktaduai 75 man striker Romelu Lukaku chuan Red Devils tana a goal hmasa ber a khung.

Nimin zing inkhelah hian Luis Silva hmangin mualneituin minute 23-naah hma an hruai a, United-in minute ruk hnuah Henrikh Mkhitaryan hmanga sutin minute 38-naah Lukaku-a'n chakna goal a khung.

United boss Jose Mourinho chuan, "Goal khung kha atan chuan a pawimawh a ni thei a, ka tan chuan goal lut mah se a khelh danah khan ka lungawi. Tui in tura kan bula a rawn kal khan 'Khelmual chhunga i chet danah ka lawm a, goal khung leh kung loah buai suh' tiin ka hrilh a. Ball a lak thlak dan te, cross ball a chan dan te, ball kan chan loh laka khingpuite a press danah kan lawm a ni," tiin Belgian striker a fak a, pressure a neih loh nan a fak chiam bawk.

United leh Real Salt Lake te inkhel hi friendly match ni mah se Antonio Valencia chu Sebastian Saucedo laka a chet mawi loh avangin hnawh­chhuah a ni. United defender hnawhchhuah a nih hma hian referee Allen Chapman chuan Jose Mourin­ho chu Valencia thlak turin thurawn a pe a, Portuguese manager-in thlak a tum loh avangin red card a pek phah ta a ni.

Hemi chungchang hi sawiin Mourinho chuan, "Second half-ah Saucedo kha hlauhawm tak takin a che fo a, chuvangin referee thurawn kha ka pawmna chhan tur ka hre lo. Pre season a ni a, friendly match a ni a, kan tan pawh inzirna vek a ni a, player 10-a khelh pawh kha inzirna a ni," tiin a sawi.

United hian Real Salt Lake lakah 2-1 chauhin hnehna chang mah se an khelhna hmun hi tuipui zawl aṭangin feet 4,500 zeta sang a nih avangin inkhelh harsatna hmun a ni a, result ṭhaa ngaih theih a ni. Jose Mourinho hote hian July 21, Zirtawpni zing dar 7:00-ah Manchester City an khelhpui leh ang.

Tute nge inlan?

First half: J Pereira, Fosu-Mensah, Lindelof, Jones, Blind, Carrick, Pogba, McTominay, Lingard, Mkhitaryan, Lukaku.

Second half: Romero, Valencia, Bailly, Smalling, Dar­mian, Herrera, Fellaini, A Pereira, Mata (Mitchell 59), Martial (Tuanzebe 90), Rashford.