AFC U23 qualifier Zanina Syria hmachhawn tur India
India chuan 2018 AFC Under 23 Championship qualification-a an match hmasa ber zanin dar 7:30-ah an khel dawn a, an hmachhawn tur hi Syria U23 an ni. Inkhel hi television lamah live-a en tur a awm dawn lo a, internet kaltlanga live streaming erawh awm tura beisei a ni - hei pawh a chiang chuang lo!
India squad-ah hian Mizo paruk, Aizawl FC defender Lalruatthara, Chennaiyin FC rawlthar beiseiawm Jerry Lalrinzuala, DSK Shivajians defender Sairuatkima, midfielder Jerry Mawihmingthanga, Lallianzuala Chhangte leh Bengaluru FC striker Daniel Lalhlimpuia te an tel.
Mizo dinhmun
India coach Stephen Constantine-a'n U23 tana inlan turin Mizo paruk ngawt a ko a, tun dinhmunah chuan Mizo player ten India team-ah hmun pawimawh 'ber' an chang phak tih hiala sawi ngam a ni - qualifier match khel tura an inbuatsaihna friendly match-a Singapore an hmachhawn ṭumin Mizo player panga an inlan.
Hei mai hi a la ni lo cheu, India leh Singapore hi vawi hnih an inkhel a, inkhel hmasa zawkah Indian defender beiseiawm ber pawla sawi ni der tawh Lalruatthara chuan captain armband a hreng a, Hmunhmelṭha tlangval captain-na hnuaiah India hi 1-0 in an chak. Match hnihnaah Mizo tlangval tho Daniel Lalhlimpuia chu captain-ah ruat a ni thung a, Serchhip striker hoin India hi 1-0 in an tlawm thung.
Beiseina
India U23-in friendly match an khelh hmasak zawkah Lalruatthara, Jerry Lalrinzuala leh Daniel Lalhlimpuia ten inkhel bul an ṭan a, Lallianzuala Chhangte chu second half-ah tlan luhtir a ni bawk. Match hnihnaah match hmasa bera bul ṭantu Ruatthara, Jerry leh Daniel ten inkhel bul an ṭan nawn a, Lianzuala'n bul ṭan ve bawkin Sairuatkima chu minute 75-naah tlanluhtir a ni.
English manager-in Singapore laka a player-te a remkhawm dan ngaihtuahin Ruatthara, Jerry leh Daniel-a ten Syria lakah inkhel bul an ṭan leh ngei a beiseiawm a, AFC.Com-in player en bik tur 10 a thlanchhuah zinga lang phak Lianzuala'n inkhel bul a ṭan loh pawhin bench
aṭang tal chuan tlan luhtir a nih a beiseiawm bawk.
Hmabak chu
2018 AFC U23 Championship chu January 9-27 inkarah China-ah khelh a ni dawn a, Asia khawmualpuia ram 16-ten kum 23 hnuai lam zinga football thiam ber nih an inchuh dawn. China chu a thlengtu an nih avangin tling chiang sa an ni a, tunah hian hmunruak 15 a la awm tihna a ni. Ram 36 chu Group A-I ah ṭhen hran an ni.
Group tina a ti ṭha ber zel chu AFC U23 Championship khel turin an tling ang a, group pakua aṭanga pahnihna zinga ti ṭha panga an tling bawk ang. China chu tling chiang mah se tournament inbuatsaih nan qualifier-ah hian an inlan ve dawn tho a, group hmahruaitu an ni emaw pahnihna ti ṭha panga zinga an tel a nih chuan runners up zinga ti ṭha paruknain AFC U23 hi an khelh theih phah ang.
India dinhmun
Group C-ah India an awm a, qualifier thlengtu Qatar, Syria leh Turkmenistan te nen an awm ho avangin an kalkawng a awlsam dawn lo. Qatar leh Syria hi engtiklaimahin Asia-ah na na na chuan team nem tia sawi an ni ngai lo a, an rawlthar player rual hi an chhiat thut a beiseiawm loh!
India-in zanina Syria an hmachhawn hunah chak ngei an tum a pawimawh dawn, Aizawl FC midfielder hlui Mahmoud Al Amna-te ram hi an hneh lo a nih chuan July 21 zanah Qatar nen an inkhelh lehnghal dawn avangin a harsa tawh ang. India U23 hian July 23-ah an match hnuhnung ber an khel dawn a, an group-a team hlauhawm lo ber ni tura ngaih Turkmenistan an hmachhawn dawn a ni.
Constantine thukhawchang
Inelna hmachhawnna tur hmun Qatar a lum a, mahse India coach Constantine chuan India U23 tan buaina a nih a rin loh thu a sawi. English manager chuan, "Sik leh sa vangin buaina kan nei turah ka ngai lo. India pawh a lum em em a, Qatar nen thuhmun reng a ni. Ka player-te an in fit a, inkhel turin kan inpeih tawh a ni," tiin taksa lam chu inkhel tura a inpeih tawh thu a sawi.
India senior team enkawltu ni bawk chuan sawi chhunzawmin, "Kan hmabak hautak zia hi a hma pawhin ka sawi tawh. Mahse, kan ruahman anga khelhchhuah kan tum phawt ang a, kan khingpui apiangte lakah kan game kan thlak zel ang," tiin an hmaa chona inchhawp chu a thlir lawk.