Swansea striker hlui Michu a chawl ta
Premier League ngainatu i nih chuan Swansea City forward, a kut dinglam phar chhuaka, vai vir chunga a goal khung lawm ṭhin Michu kha i hre ngei ang - tunah chuan khelmuala a goal khung lawm leh tawh ngai lo turin a boot a khai ve ta.
Spanish forward hi kum 31 leka upa la ni mah se a hliam vangin ngai a awh thei tawh lo a, inkhelh luih zel ai chuan chawlhsan mai a thlang ta zawk. Michu thupuangtu chuan, "Michu hi a ke rek ding lam hliam vangin khelmuala inlan zui zel chi a ni tawh lo," tiin a player chawlh thu a puang.
Michu inlarna
Kum 2012 khan Swansea City chuan Rayo Vallecano
aṭangin Michu an lalut a, a man zat hi pound maktaduai hnih lek a ni - Swansea a zawm hma kumah hian La Liga club tan hian match 39 khelin goal 17 a khung a, a man zat hi tlawm tak a ni.
Michu-a'n Premier League-a a season hmasa berah a zia a chhuah nghal a, Welsh club tan hian inelna hrang hrangah match 43 khelin goal 22 a khungsak. Premier League-ah pakuana nichungin season an khar a, League Cup-ah an champion bawk - Swansea-in English football a nomawi an chawi hmasak ber a ni hial.
Michu hriatrengna
Pound maktaduai hnih man lek nichungin Michu-a'n Premier League-ah a hming a chher a, goal 22 a khung zingah hriatreng tlak goal tam tak a awm. August 12, 2018 khan Swans-in QPR lakah an league match hmasa ber an khel a, 5-0 ngawtin an chak. Coach Michael Laudrup hnuaia an Premier League match hmasa ber ni bawkah hian goal hnih a khung a, Welsh club ṭantuten Michu hming an theihnghilh leh tawh lo.
December 2012-a Arsenal si hnih faia an hneh ṭumin an inhnehtawk dawn emaw tih tawh hnu hun tawp lamah goal hnih a khung a, League Cup semifinal first leg-a Chelsea 2-0 a an hneh ṭumin 'cool' takin a khung a, final-a Bradford 5-0 a an sawp
ṭumin a khung leh bawk - Swansea thawnthu ziak danglamtu ti hiala sawi ngam a ni.
Mahse maw...
Michu-a chet ṭhat avangin Swans-in January 2013-ah contract thar an ziahpui lehnghal a, 2013-14 season ṭan dawnah a vawi khat nan Spain tana inlan turin koh a ni - Belarus laka 2-1 a hnehna an channa inkhelah a inlan. Mahse, Spanish striker tan beisei angin thil a kaltluang lo.
Hliam vangin ngai a awh tawh lo a, inelna hrang hrangah match 25 inlanin goal ruk chiah a khung. December 2013 hnuah Welsh club tan match nga chiah a khel a, 2014 nipui a lo herchhuah meuh chuan Napoli lamah season khat chhung loan-a khel turin a kal.
A tho tawh lo
Napoli-in a loan hun a zawhah Michu lak ngheh theihna dan nei mah se Spanish striker hi Serie A-ah pawh hliamin a kiansan lo. Italian club tan match ruk chiah a khel a, goal a khung lo. Kum 2013-a Swans-in pound maktaduai 30 an chhiar striker hi November 2015 a her chhuah meuh chuan Swans hian a thlawnin an chhuah tir.
Michu-a'n a hliam enkawl dam tumin Spanish fourth division club Langreo a zawm a, match 17-ah goal 12 a khung sak. Season hmasa ṭan dawn khan beiseina sang tak nen amah chher chhuaktu Oviedo a zawm a, Spanish second division club tan league match 27 khelin goal khat a khung - a hliamin a tibuai reng bawk si a, ngai awh theih inbeisei tawh lo striker hian a chawlh thu a puang ta.
Mangṭha mai le...
Michu-a'n football khawvelah hun a hman chhungin club paruk tan a khel a, match 387 khel chungin goal 100 a khung. Spanish striker thupuangtu chuan, "Michu hian inkhel zel tur chuan theihna a nei tawh loah a inngai a ni. Medical lama mithiamte a rawn hnuah chawlh mai hi thutlukna dik niin a ngai a ni," tiin a striker chu amah enkawltu doctor-te pawhin ngai a awh leh an beisei pui tawh loh thu a sawi.
Swansea-a a season hmasa bera Club Player of the Year leh Fans Player of the Year ni kawp thei Michu-a'n inkhelh a chawlhsan rualin enge a tih chhunzawm dawn? tih zawhna a awm nghal a, a thupuangtu chuan, "Coaching lamah a kal chhunzawm ang," tiin a sawi - a club hmasa ber leh hnuhnung ber ni bawk Oviedo-ah hian a thawk chhunzawm dawn nia sawi a awm.