PSG leh Monaco inhnehtawk

Neymar-a goal hnih khung chu Paris St-Germain chak nan a tawk zo lo. Pathianni zan Ligue 1 inkhelah an mikhual AC Monaco nen 3-3 a inhnehtawkin French champion hi point khat an hmuh belhah an lungawi a ngai.

Parc des Princes-a inkhelah Barcelona forward hlui Neymar-a'n minute thumnaah goal hmasa ber a khung a, mikhual lamin Gelson Martins (7') leh Wissam Ben Yedder (13') te hmanga chhangletin hma an hruai let daih.

Monaco defender Fode Ballo-Toure chuan anmahni lamah ti lut palhin team pahnih te 2-2 a ni a, chawlhlawk hma deuhin Neymar chuan a vawi hnih nan a club hma hruaipuiin penalty a khung.

Second half-ah Monaco an tlawm mai duh bik lo, minute 70-naah Islam Slimani hmangin an sut. Slimani goal hi hun rei deuh tak chhung video assistant referee hmanga endik a nih hnuah pawm a ni chauh.PSG tan hian penalty hlawh chhuaktu Kylian Mbappe leh striker tawnhriat ngah Edinson Cavani ten chakna goal khung theihna hun ṭha an neih an bawhpelh a, inkhel hmuhnawm leh goal ruk ngawt a luhna inkhelah chak zawk an awm thei lo. Thomas Tuchel-a enkawl PSG hian Ligue 1 match 19 an khelh tawhah point 46 hmuin hmahruaitu an ni mek a, anmahni hnaih bertu Marseille aiin match khata khel tlem zawk chungin point ngain an sang zawk.