Aizawl West derby-ah West Warrior vannei

Lalbiakliana Memorial MFA Super Cup-ah Chanmari West-in semifinal thleng turin Dinthar FC penalty shootout hmangin an hneh. West Warrior hian July 21, Zirtawpni tlai dar 3:30-ah Mizoram Police nen final luh an inchuh ang.

Semifinal hmasa zawkah Chhinga Veng FC leh Venghlui FC te tlai dar 1:00-ah an inkhel dawn bawk.

MFA Super Cup-ah hian quarterfinal lut pha chinin Rs 8,000 an dawng a, semifinalist-in Rs 20,000 an dawng dawn. Champion-in nomawi bakah Rs 2,00,000 an hawn dawn a, pahnihna tan Rs 80,000 dah a nih bawk avangin final thlen phak a pawimawh ang.

Inkhel hmuhnawm
Dinthar coach Lalhlupuia Sai­lo-in a sawi lawk angin tawn­hriat nei ṭha inkhel bul a ṭantir a, Nigerian midfielder Cla­rence Carter-a'n hmun pawimawh a chang nghal.

Chanmari West coach HC Zarzoliana'n sa huai ser nghalin captain Lalnunmawia-te unau hmangin tlarhma a rem ve bawk.

West Warrior-in bul an ṭan ṭha zawk a, tun inelnaa goal kua khung tawhtu Mawi­tea'n Dinthar keeper Mal­sawm­dawngzela fiah thei lo mah se ama petna tur khawp hmun awl a insiam thiam hle.

Dinthar lam an bet nachung­in midfielder Carter erawh a ṭangkai a, Nigerian midfielder hian ball a sem ṭhat bakah 50-50 ball a chan theih avangin na zawka goal nawr tum West War­rior an duh angin an che thei lo.

First half-ah Maimawms an vannei a, crossbar-in a chhanhim bakah West Warrior goal khung chu offside vangin pawm a ni lo.

Dinthar pawhin counter attack hmangin chance ṭha an nei a, Lalnunsanga'n (Tale-a) a ball ṭha hmuh chu keeper Malsawma'n a dan sak.

Goal hnih
Second half minute thumna lekah Dinthar FC-in an freekick hmuh an hmang ṭangkai a, defender goal khung thei Lal­nunpuia'n hmahruaina a khung.

Chanmari West-in an si­phurh sut turin freekick bawk an mamawh a, minute 63-naa Jacob Lalrawngbawla freekick pet chu Tlangthanpuia'n a tauh goal a, 1-1 a ni.

Ruahsur vangin team pa­­hnihin an duh angin an khel thei lo a, goal dang a luh tawh loh bakah inkhel hmuh­nawm a tlahniam bawk. Hun pangngaiah 1-1 a ni a, penalty hmanga chak zawk zawn a ni.

Vannei leh Vanduai
Chanmari West tana pet hmasa bertu Jacob-a'n goal zawnah a pet thei lo a, Dinthar FC tan Malsawma Chhangte, Clarence Carter leh Samuel Laltlanthanga ten an pet goal a, West Warrior tan Calvin Zosiamliana, Tlangthanpuia, Lalromawia leh C. Lalremruata ten an khung.

Dinthar goal khung khawl Michael Lalremruata a rawn pen chhuak a, bench aṭanga lut Khatla tlangval hian goal a khung a nih chuan Maimawms-in hnehna an chang dawn a, amaherawhchu a pet goal loh vangin West Warrior-in beiseina an neih phah.

Sudden death-ah Chanmari West tan Lalmawizuala'n a pet goal a, Dinthar FC aiawha pen chhuak substitute Lalbiaknia'n goal zawnah a pet lo a, West Warrior an chak.

Chanmari West coach Zara chuan, "Semifinal kan thleng thei hi kan lawm a, kan vannei a ni. Mizoram Police kan hmachhawn dawn a, hneh tur chuan kan theihna zawng zawngin kan khel ang," tiin Vanglaini a hrilh.

Inkhel Result
Aizawl FC Academy 1 - 4 Mizoram Police FC
AFC : Lallawmawma 50' (P)
MPFC : F. Lalrinpuia 7'; Lalchungnunga 13' (OG); Lalruatpuia 69'; Lalfakzuala 81'
Inkhel Result
Chanmari West FC 1 - 1 Dinthar FC
Penalty Shootout-ah Chanmari West 5-4 in an chak
CWFC : Tlangthanpuia 63'
DFC : Lalnunpuia 48'
Penalty Pet Dan
Chanmari West FC
Jacob Lalrawngbawla X
Calvin Zosiamliana G
Tlangthanpuia G
Lalromawia G
C. Lalremruata G
Lalmawizuala G
Semifinal - July 21, Zirtawpni
01:00 PM Chhinga Veng FC Vs Venghlui FC
03:30 PM Mizoram Police FC Vs Chanmari West FC
Final - July 24, ThawhṬanni
3:15 PM Win of SF1 Vs Win of SF2