Hammers goalkeeper thar Joe Hart
Manchester City goalkeeper Joe Hart chuan season khat chhung loan-a khel turin West Ham a zawm. Kum 30-a upa keeper hi loan thoa a khelhna Torino aṭanga Etihad Stadium lama a kir hnuah pawh coach Pep Guardiola chuan a mamawh loh thu a hrilh a, London club hi a zawm dawn ta a ni.
Kum 30-a upa goalkeeper hi club dang pawhin beisei mah se amah duhtu zingah Hammers pan a duh ber thu City a hrilh a, an club goalkeeper duhthlanna hi City chuan zahsakin takin ruahmanna an siamsak a ni. Hammers hian a hranpain loan hun a zawhah Hart lakluh theihna dan an nei dawn lo a, an lei duh a nih chuan club dang ang thoa City an dawr ve a ngai ang.
City hian Hart-a hlawh an tum ṭhen dawn a, hetihrual hian Hammers hian loan-a an hawh manah City hi pound maktaduai 4.5 an pe tho ang. Hart chuan, "Ka tana pawimawh ber chu football khelh a ni a, he hmuna inkhel tura ka lokal thei hi ka lawm takzet a ni," tiin Hammers a zawm thei chu a lawm thu a sawi.
England tana vawi 71 inlan thei goalkeeper hian City tan Premier League nomawi pahnih a chawi tawh a, mahse season hmasaa Pep-a'n City a pan rualin mamawh a nih loh thu hrilh a ni tawh. Club pahnih inremna ang chuan City an hmachhawn hunah a inlan thei lo ang.