AFC Academy tan Police an û hret

Mizoram Police-in Lalbiakliana Memorial MFA Super Cup aṭanga I League champion Aizawl FC an pet chhuah hnu ah, nimin khan Lammualah Aizawl FC Academy 4-1 in an hneh a, inbuatsaihna nei ṭha team hian awlsam takin semifinal an lut.

Ṭialthawnga enkawl Police tan F. Lalrinpuia, Lalruatpuia leh Lalfakzuala ten goal an khung bakah AFC Academy player Lalchung­nunga'n an lamah a tauh lut a.

Police-in goal hniha hma an hruai laiin AFC Academy captain Lallawmawma'n penalty a khung a, amaherawhchu si phurh sutna goal an khung zui theih loh avangin an chak lohna zat chu 1-4 lawih a ni.

Police tan Valpuia

MPL4-ah Aizawl FC-in Police aṭangin F. Lalrinpuia leh Lalbiak­hlua te an hawh a, Mizoram inelna sang bera AFC an champion-na kawngah Police player an ṭangkai a, Valpuia hian mimal lawmman awm thei best player, best forward leh top scorer lawmman a hui vek - Police an relegate thung!

Valpuia hian inhliam chungin season a khar a, MPL4 final-a Chanmari an hneh ṭum pawhin a inlan lo - hemi hnu hian ngai a awh leh tawh lo. Season liam taa first division champion an nih

ṭumah pawh a khel tam tawk lo a, tun season-ah coach Ṭialthawnga hnuaiah intuai tharin attacking mid­fielder hna a chelh a, hun pawi­mawhah a theihna a pholang leh ṭan ta.

Nimin inkhelah Valpuia hian freekick aṭangin minute 7-na lekah a khung a, first half-ah goal ngei theihna tura a ball ṭha pek Fakzuala leh Sangbera ten an khung lo.

Minute 14-naah Biaktea cross chu AFC Academy player Lal­chung­nunga'n an lamah a tauh lut a, goal hniha hmahruai Police-in inrintawkna an neih phah a. Hun chanve hmalamah Mala hote an che thei lo a, 2-0 in first half a tawp.

Mala hote an huaisen

First half-ah Police an chung­nung a, amaherawhchu second half-ah Mala kaihhruai AFC Academy insiamṭhain ṭan phat aṭangin an nawr nghal a. AFC Academy forward David Lalhlansanga'n ball chhuak per chang fuhin goal ruakah a pet a, a chet muan hret avangin Police defender an inrawlh hman. Goalline clearance an neih hnuah Police an insiam ṭha thei lo a, penalty an chawi. AFC Academy captain Lallawmawma'n keeper Lalṭanpuia bumin a pet goal.

Semifinal lut tawha inngai Police dinhmun a phet a, Aizawl FC Academy goal nawr a na tulh tulh bawk. Ṭum dang ang thoin Police keeper ṬP-a a che ṭha a, AFC Academy tan Lalremmawia leh Jakob Lalhlimpuia te finishing a la ṭha tawk lo bawk.

1st Bn MAP Football Academy

aṭanga senior team Police zawmtu Ruatpuia'n minute 69-naah 30 yards vel aṭangin kawh zetin a pet goal a, Police talbuai tawh a chhanhim.

Hemi hnu hian Policegame afuh chho a, Police forward Fakzuala'n keeper leh defender inringthul nang fuhin minute 81-naah goal lina khungin 4-1 in inkhel a tawp.

Police nge nge

Police-in season liam ta khan Aizawl DFA hnuaiah First Division League an khel a, league round-ah AFC Academy ṭum hnih an hneh bakah champion turin final-ah 4-1 in an sawp leh bawk.

Nimin quarterfinal-a hnehna an chan leh takah chuan Police hian an intawn hnuhnung paliah AFC Academy hi an hneh vek a, rawlthar rual tan chuan Mizoram aiawha vawi tam khel tawh awm khawmna Police el phak a la harsa a ni.

Mizoram Police hian Aizawl FC leh an academy an hneh a, tunah chuan MFA Super Cup-ah AFC hming pu an awm tawh lo.

I League club hi tun inelnaah team li - senior team, academy, Under 18 leh Under 16 tein an chhuak a, a thleng sang ber AFC Academy chu quarterfinal-ah an zin kawng a tawp.