Man United-a cham rei duh Mourinho

Jose Mourinho chuan kum 15 dang Manchester United enkawl chhunzawm leh a duh thu a sawi. Hetihlai hian Chelsea manager hlui hian khawvela a ṭha berte zinga mi nih reng erawh thil awlai a nih loh thu a sawi tel bawk.

Kum 54 mi Mourinho hian season hmasa khan United a enkawl ṭan a, a season hmasa berah League Cup leh Europa League nomawi a chawipui. Premier League-ah parukna ni mah se season tharah Champions League an khel ang.

Portuguese manager Mourinho chuan, "United kum 15 dang enkawl chhunzawm turin ka inpeih, mi hrang hrang hian club an chetṭhat loh chuan manager an dem ṭhin. Hna hautak leh khirhkhan ni mah se hun rei zawk enkawl turin ka inpeih," tiin a sawi. Mourinho hian tun hmain Blues bakah Porto, Real Madrid leh Inter Milan te a enkawl tawh a, club pakhatah season thum aia rei a cham ngai lo.

United hi season thar inbuatsaihin USA-ah an awm mek a, Real Salt Lake 2-1 a an hneh ṭuma inhliam midfielder Juan Mata chu chawlhkar khat vel a chawlh a ngaih dawn avangin Spain international hian team training a la zawm lo. Hetihlai hian hliam tenau tuar Matteo Darmian erawhin harsatna nei loin training a zawm leh tawh thung.