Reds dilna Leipzig-in hnawl

Liverpool-in Mohamed Salah an lakluh hnuah an club player manto ber ni turin RB Leipzig midfielder Naby Keita dawr mah se German club chuan Reds dawrna hi a vawi hnih nan an hnawl.

English chanchinbu lar The Times-in a tarlan dan chuan Liverpool hian a vawi hnih nan Keita hi pound maktaduai 66-a lakluh tumin an dawr a, mahse Bundesliga-a an season hmasa ber 2016-17 a pahnihna dinhmun lauh thei club hian an hnar. Leipzig hian kum 22-a upa midfielder hi Champions League an khelh dawn avangin chhuahtir an tum loh thu an lo sawi chiang tawh.

Reds boss Jurgen Klopp chuan, "Thil tihchian theih engmah a la awm lo a, August 31 thleng transfer hun a la inhawng a ni," tiin Keita chungchang zawhna a lo chhang tawh a, an player duhzawng lakluh a harsat thu a sawi bawk.

Liverpool hi Hull City left back Andrew Robertson nen sawizawm mek an ni bawk a, Championship club nen hian pound maktaduai riatin an inrem tawh ni hialin khawthlang media te chuan an tarlang.