Szczesny-a'n Juventus a pan

Italian champion Juventus chuan Arsenal goalkeeper Wojciech Szczesny an lalut dawn tih a chiang tawh, he thu i chhiar meuh chuan contract an ziak fel tawh tura ngaih a ni.

Thawhlehni khan kum 27 mi Szczes­ny hian Turin a pan a, tluang takin medi­cal test pawh a paltlang tawh. Season hnih chhung loan hmanga AS Roma tana khel tawh keeper man zat hi pound maktaduai 10 vel ni tura ngaih a ni.

Poland international hian Gunners tan kum riat chhungin match 132 a khel a, tun dinhmunah Emirates Stadium-ah Petr Cech leh David Os­pina an awm avangin hmun pawi­mawh a chang phak lo.

Inkhelh tam a duh avangin Szczesny hian Serie A club Roma a zawn a, season hmasa khan a club tan league match 38 khel kim vekin clean sheets vawi 14 a nei - Italy league sang berah ani a aia clean sheet nei hnem an awm lo. Juve-ah erawh captain Gianluigi Buffon a la awm avangin rinrawl a ni phak rih lo ang.

Arsenal manager Arsene Wenger-a'n an squad an la insiksawi chhoh tur thu a sawi a, "Kan team mi ti chak thei tur kan la zawng reng, chutihrualin ṭhenkhat erawhin min chhuahsan a ngai thung. Team inbuktawk tak kan neih a ngai a, tunah hian transfer bazarah hun kan la hmang mek a, player ṭha la turin hun remchang kan neih theih ngei ka beisei," tiin a sawi.

North London club hi Premier League season thar inbuatsaih nan China-ah an zin mek a, nizan khan German champion Bayen Munich nen an inkhel a, he thu buatsaih lai hian result kan hre hman lo.