Chelsea coach Conte hlawh a pung

Italian manager Antonio Conte chuan kum hnih daih contract a neih lai chu ennawnin Chelsea nen inremna thar an siam a, Blues manager awm tawh zinga hlawh hnem ber a ni ang.

Kum 47 mi Conte hi Stam­ford Bridge-ah hun rei zawk cham dawn tihna a ni lo a, a hlawh a pung dawn tihna a ni zawk. Blues manager hian a contract hmasaah khan kum khat chhungin pound maktaduai 6.5 a hlawh a, contract tharah chuan kum khat chhungin pound maktaduai 9 a hlawh tawh ang.

Italian manager hian season hmasa ṭan hma khan Chelsea tan kum thum daih contract a ziak a, kum khat chiah a la hmang zo. A bul ṭan kumah Blues hi Premier League no­mawi a chawi pui nghal, league champion ni tur hian a zawna vawi 13 hnehna changin club record thar an siam hial.

Juventus manager hlui Conte chuan, "Season hmasa khan hlawhtlinna chang turin kan thawkrim em em a, kha vang khan season tawpa nomawi kan chawi pawh kha a hlu in a chuanawm hle. Season tharah pawh kan thawkrim leh zual ang," a ti.

Conte chuan sawi chhun­zawmin, "Contract thar ka ziak thei hi ka lawm hle, he hmuna ka rawn kalh tirh aṭang khan fans lamin min thlawp ṭha em em a, anni hi hlawhtlinna kan chan theih nana mi pawimawh an tling," a ti.

Chelsea hi season thar inbuatsaih nan China-ah an zin mek a, Inrinni tlai dar 5:10 hian league lama an elpui Arsenal nen Bird's Nest Stadium-ah an inkhel dawn, hemi zawh hian Bayern Munich leh Inter Milan te an hmachhawn leh bawk ang.