Neymar hma hun a chiang lo?

Barcelona president Josep Maria Bartomeu-a'n an player duhlai Neymar an chhuahtir loh tur thu a sawi, Brazil captain lak tumtu Paris St-Germain tan thu ngaihthlak nuam lo tak a ni ngei ang. Hetih lai hian khawthlang thuthar thehdarhtu tam tak chuan Neymar hian Paris pan a hreh lo niin an sawi thung.

Kum 25 mi Neymar hi chhuak tura sawi thawm a awm fo a, tun hnaiah sum ngah PSG chuan man to uchuak takin lakluh an inhuam nia sawi a ni. He thu leng vel hian Catalan club ngei pawh a nghawr nghing tih a chiang.

Brazilian club Santos aṭanga Barca zawmtu Neymar hian nikum October thla khan kum nga daih contract a ziak thar a, an inrem dan chuan pound maktaduai 195-a lei ngamtu an awm a nih chuan a chhuak thei ang tih a ni.

French Ligue 1 club PSG lam hi Arab sum hmanga insiam lian chho mek zel an ni a, an mit it zawng lalut turin sum an ren lo. Pound maktaduai 195 zetin Neymar hi lakluh an ngam nia sawi a ni a, Barzil international pawh hian PSG zawm a hreh lo niin khawthlang media-te chuan thu an thehdarh nasa hle.

Barcelona hian khawih chet thiang lo Lionel Messi an nei a, an club tana goal khung hnem ber Messi a awm miau avangin Neymar hi chu Messi-a thlachhang dawltu pakhat zinga mi ang maia sawi ṭhin a ni.

Neymar hian Barca tan season li chhung inelna hrang hrangah match 186 khelin goal 105 a khung tawh a, league nomawi pahnih leh Cham­pions League pakhat a chawi tawh - season liam ta khan La Liga-ah match 30 khelin goal 13 chiah a khung.

Barcelona hian tun nipui chhungin PSG midfielder Marco Veratti lakluh an tum ve mek bawk a, season hmasa Ligue 1-a pahnihna hian Italy international Verratti manah pound maktaduai 88 vel an phut ve thung. Nipui transfer bazar a la ngaihnawm chhunzawm zel dawn niin a lang.