Lazio player thar Leiva, mangṭha Lucas
Liverpool midfielder Lucas Leiva chuan Anfield-ah kum sawm zet hun a hman hnuin Merseyside club a mangṭha ve ta - pound maktaduai ngain Italian club hi a zawm a, AC Milan pantu Argentine midfielder Lucas Biglia hmunruak luahlum tura lakluh a ni.
Kum 30-a upa midfielder hian Reds-ah kum 10 hun a hman chhungin inelna hrang hrangah match 345 a inlan a, Premier League bikah match 247 khelin 2011-12 season-a League Cup nomawi a chawi bak champion puina erawh a nei lo.
Mangṭha Reds
Lucas-a'n kum 10 zet Reds-a hun a hman chhungin fa pahnih a nei hman a, Liverpool khawpui hi an in ang maiin a hmang. Brazil tana vawi 24 inlan thei midfielder chuan, "Liverpool hi khawvela club ropui ber pawl a ni a, he hmunah hian ka hun zawng zawng hmanral vek ka duh. Mahse, khelmualah hmun ka chan tam loh chuan chhuah mai chu ka tana ṭha ber niin ka ngai bawk si a ni," a ti.
Liverpool boss ni lai Jurgen Klopp-a'n midfield aia defence lama a chhawr ngun zawk defensive midfielder chuan, "Ka hmaah thutlukna awlsam tak a inchhawp a, chu chu khel phak dawn lo mah ila Liverpool-a hahdam taka cham reng a ni. Mahse, footballer leh inelna hmachhawn nuamti mi ka nihna aṭangin chu thutlukna siam chu a rem si lo. Liverpool ka chhuahsan tur avanga ka lungngaih em em rualin Italy club lian Lazio ka zawm thei tur erawh ka lawm takzet a ni," tiin a hmangaih Reds a mangṭha a, hlim taka Lazio kawr ha turin a inpeih tawh.
Bul ṭanna chu
Lucas-a'n kum 2007-ah Gremio aṭangin Liverpool a zawm a, a man zat hi pound maktaduai nga a ni. Reds-a pan hma season-ah Brazil-ah a vul a, Serie A team of the year-ah a lan bakah Brazilian sports magazine Placar-in kumtina a thlan ṭhin Serie A player ṭha ber Bola de Ouro chawimawina a dawng - Romario, Robinho, Kaka leh Carlos Tevez ten an lo dawn tawh chawimawina danwg thei zinga naupang ber a ni.
Liverpool fan-ten beiseina sang tak nen Lucas an thlir a, mahse an beisei ang 'Brazilian player' kha a ni tlat lo! Reds fan-te zingah Lucas duh lohna au thawm a ring a, 'Liverpool kawr ha tlak lo' ang hialah an chhuah a, player huaisen lo tan chuan puanthuah tel chunga khaw dang panna tham a ni. Mahse, ani chu Lucas a ni a, a beidawng ve ngai lo.
Hmana an duh loh kha...
Lucas-a'n amah sawiseltute a chhanglet lo. A ngawi reng a, rim takin training ground-ah a thawk thung. Kum 2009-a Xabi Alonso leh kum 2011-a Javier Mascherano ten Anfield an chhuahsan khan Lucas-a tan kawl a eng ṭan a, Liverpool-ah hmun pawimawh a chang chho ṭan.
Kum 2010-ah Liverpool Young Player of the Year-ah thlan a ni a, 2010-11 season a zawh meuh chuan Brazilian midfielder hi Liverpool Player of the Year-ah hial thlan a ni - Liverpool khawchhuak chu 'scouser' tiin an ko ṭhin a, Reds fan-te chuan Brazilian midfielder hi an thinlungah nghet takin an kuangkuah a ni tih lantir nan 'scouser' tiin a chanchin an sawi ṭhin hial.
Hun tawp lam
Lucas-a'n season hman zawh takah Reds tan match 31 chiah a khel phak a, heng zinga a tam zawkah hian a position pangngai defensive midfielder niloin centre back-ah chhawr a ni ṭhin. Season hmasa zawh rual khan Brazil international hi Reds tana kum 10 a khelh tlin avangin chawimawina hlan a ni a, he chawimawina hlantu hi amah chhawr thiam em em tu manager Kenny Dalglish a ni.
Rafael Benitez-a lakluh midfielder hian kar hmasa Nilainia Tranmere Rovers nen friendly match an khelh ṭumin tlarhnung laiah Joel Matip a dinpui a, Reds tan a match hnuhnung ber a ni ta. Wigan Athletic nen an inkhelh ṭumin inlan lo mah se fan-te a hming lamin an zai rual a, "Ka tan chuan hriat a nuam em em a ni," tiin a sawi.
Player thawkrim
"Club tana a theihna zawng zawng hlan ṭhin. Duhna, chakna leh inpekna tihte hi Lucas chungchang ka ngaihtuah apianga ka rilrua lo awm ṭhin chu a ni. Player ropui tak, naupang zawkte tana entawn tlak a ni a, LFC tana chhiahhlawh rinawm tak i nih avangin lawmthu ka hrilh che," tiin Reds legend Steven Gerrard chuan a ṭhianpa hi a thlah.
'God' tia hminglem an pek Robbie Fowler chuan, "Min an rinhlelh apiangin khelmualah a chhanna a pe ṭhin a, Reds tan bawih rinawm tak a ni," a ti a, BBC football reporter Juliette Ferrington chuan, "Amah sawiseltute chu a theihna leh thawhrimna hmangin a chhang ṭhin a, boruak sang tak hnuaiah pawh a tlawm duh lo. He club leh khawpui nena an inzawmna hi a thuk em em a, mahse thil ṭha ber pawh hian tawp hun a nei ṭhin," tiin Lucas chungchang a sawi ve thung.