ISL draft Goalkeeper manto zingah Thuama leh Albino

Indian Super League chuan season thar atan ram chhung players lilam turte chu ISL draft-ah a dah lut a, ISL draft a awm player-te hi an vaiin 199 an ni.

Draft bik aṭanga tehin player hlawh tlem berin season khatah nuai li an hlawh dawn a, a hlawh hnem berin vaibelchhe 1.1 a hlawh thung ang.

ISL draft-a player manto ber tur chu Eugeneson Lyngdoh leh Anas Edathodika te an ni a, player pahnih man inṭanna zat tur hi vaibelchhe 1.1 a ni. Goalkeeper zingah Subrata Paul man zat chu nuai 87-ah inṭanin a to ber a, Mizo tlangval Lal­thuammawia chu palina niin amah duhtu club chuan nuai 38-a an chhan ṭan a ngai dawn a, Aizawl FC goalkeeper hlui Albino Gomes chu pathumnaah awmin nuai 50-ah a inṭan dawn thung.

Player 199

ISL draft-ah player 199 awm mah se lei vek erawh an ni dawn lo - mi 134 tan bak hmun a awm lo.

ISL club pariatin ramchhung player 16 an chelh a, club tinin a tlem berah Indian player 15 an neih a ngai bawk. Chumi awmzia chu draft-ah hian player 134 chu hralhchhuah an ni dawn tihna a ni a, footballer 65 an awl ang.

Draft-ah hian player an la awm belh dawn nia sawi a ni bawk a, chuvangin player lei loh hi 65 aṭang hian a la pung leh thei ang.

Player langsar chin erawh hralh loa an awm tawp a rinawm loh - ISL chuan tawnhriat la ngah lo player tam tak draft-ah hian an telh a, anni ho hi an man pawh nuai li leh nuai ruk inkar a ni tlangpui.

ISL club-te hian additional player pathum ṭheuh an nei thei bawk a, an zinga pakhat chiah ram pawn player a ni thei. Chumi awmzia chu ISL club-ten draft-a lei loh player aṭangin additional player an la nei leh thei dawn tihna a ni a, an la lak belh thei dawn.

Hlawh nge man?

Player-te man inṭanna zat hi an hlawh tur a ni. Champhai tlangval Lalthuammawia man zat inṭanna chu nuai 38 a ni a, Bengaluru FC goalkeeper hian season khatah a tlem berah chuan heti zat hi a hlawh dawn tihna a ni. Shillong Lajong-a a professional zin kawng zawh ṭantu hian duhtu a ngah leh a hlawh a pung dawn tihna a ni mai.

Entirnan, kum 2015 khan Eugeneson Lyngdoh chu a base price chu nuai 27 chauh a ni. Mahse, Khasi midfielder hian ISL club zingah amah duhtu a ngah a, a tawpah a chhang huai bertu Pune City-in an chang - vaibelchhe 1.05 a hlawh.

Hlawh hnem tur

Draft-a tel lo zingah Sunil Chhetri-a'n season khatah vaibelchhe 1.5 a hlawh dawn a, Jeje-a'n vaibelchhe 1.3 a hlawh dawn thung - Indian striker chhuanvawr pahnih hlawh hi player dangin an khum kher a beiseiawm tawh lo a, chutihrualin an base price in-ṭanna ngaihtuah chuan Eugene leh Anas hian player pahnih hi an hnaih hle.

Khasi midfielder Eugene-a man zat hi vaibelchhe 1.1-ah a in ṭan dawn a, Delhi Dynamos-in vaibelchhe khat hlawhtir an inhuam loh avanga draft-a tel tur Anas Edathodika nen an man inṭanna zat a in ang.

Subrata Paul-a man zat inṭanna chu nuai 87 niin pathumnaah a awm a, Pritam Kotal chu palina niin nuai 75-ah a inṭan a, pangana Robin Singh man inṭanna chu nuai 65 a ni.

ISL nge nge?

I League hi India rama league sang ber a la ni zel a, I League champion hian AFC Champions League an khel thei. ISL champion hi tun season lo awm tur aṭangin AFC Cup-ah an inlan ve thei dawn - he tehna aṭanga en chuan I League hi ISL chunga awm a ni.

Hetihlai hian a tak ram kan en chuan, Indian player ṭha tam zawk hian I league kalsanin ISL an pan a, ISL player nih an duh zawk. I League player zingah ISL aia hlawh sang awm nual mah se, I League hi ngaihven hlawh lo tur zawk a ni ang.