US lamah Indian shuttler

US Open Grand Prix Gold badminton tour­nament chu nizan aṭang khan khelh ṭan a ni a, Indian shuttler Saina Nehwal inlan dawn lo mah se Sameer Verma bakah H S Prannoy leh Parupalli Kashyap te an inlan ang.

National champion pawh ni tawh Sameer-a dar na chu a dam tawh, kumina Syed Modi Grand Prix Gold nomawi chawi tawh Sameer hi a dar na vangin thla hmasa a khelh zawh tak Indonesia leh Australia Super Series-ah a inlan lo, tun ṭumah hian beiseina a nei sang hle.

Canada Open-a beisei phak lo H S Prannoy leh Parupalli Kashyap te pawh US Open-ah an inlan zui dawn, Com­monwealth Games champion Kashyap hian a match hmasa berah seeded pakhatna Lee Hyun Il a hmachhawn dawn, fiahna hautak a ni nghal ang.

Seeded pahnihna Pran­noy-a'n Austria tlang­val Luka Wraber a hmachhawn dawn thung. Indonesia Super Series Premier-a sulhnu nei ṭha Prannoy hi chak tura rinkai zawk a ni.

Hmeichhe singles lamah Saina leh PV Sin­dhu an awm dawn loh avangin National champion Ritu­parna Das leh Ruthvika Shivani Gadde te chu India beiseina an ni ang.