FC Goa-ah Espanyol striker hlui

Indian Super League club FC Goa chuan Spanish striker Ferran Corominas chu season thar atan an lalut. Kum 34-a upa striker hi La Liga-ah Espanyol leh Elche tan pawha lo khel tawh a ni a, a kum tam deuh tawh mah se ISL-a inlan turin a la ṭha tawk.

Coro tia hriat lar striker hi Espanyol leh Elche tana a khelh laiin squad tikimtu satliah a ni lo a, club player pawimawh pawl a ni phak ve ve. Espanyol tan hian 2003-11 inkar khelin a hun tam zawk a hmang a, kum 2006-a Copa del Rey nomawi an chawi ṭum khan final-a Real Zaragoza 4-1 an sawp ṭumin goal a khung.

Copa del Rey nomawi an chawi hnu season 2006-07 ah Europa League final an lut lehnghal a, Europe-a club inelna sang ber dawttua an zinkawngah pawh hian match 11 khelin goal nga a khung. Spain U19 tan Euro U19 nomawi kum 2002 khan a lo chawi tawh a, FIFA U20 World Cup 2003-a Spain in final an luh ṭumin squad-ah a tel bawk.

Hetihlai hian Bengaluru chuan Spanish winger Antonio Rodriguez Dovale chu Spanish second division club Rayo Vallecano aṭangin an lalut ve bawk. Toni tia hriat lar, kum 27-a upa winger hian Barcelona youth team, Celta Vigo leh Leganes tan pawh a lo khel ve tawh a ni.