ATP Finals khel tur Federer
Association of Tennis Professionals (ATP)-in season tawpa player ṭha zual pariatte tana inelna an buatsaih ṭhin ATP Finals khel turin Roger Federer a tling chiang tawh, Swiss tlangval hi vawi 15 a khelhna tur niin he inelnaa inlan hnem ber record a siam dawn.
Kum 35 mi Federer hian kuminah nomawi panga a chawi tawh a, heng zingah hian Australian Open leh Wimbledon pawh a tel. O2 Arena-a inlan tur hian French Open champion Rafael Nadal pawh a tling chiang tawh bawk.
Swiss tlangval Federer chuan, "Kum 2002 aṭang khan ATP Finals hi ka khel chho tawh a, nikum khan hliam vangin ka khel thei lo. Kumin November thlaah erawh London-ah inkhelh theih ngei ka beisei," tiin season hman tluan theih a beisei thu a sawi.