Sum tamna tur US Open

Tennis tournament lian Grand Slam zinga a hnuhnung bera khelh ṭhin US Open chu August 28 - 10 September chhungin khelh a ni dawn a, kumin US Open hi tennis inelna huang chhunga lawmman tamna ber a ni dawn.

Hard court tournament lianah hian lawmman atan a pumpuia an sem ral tur zat hi US dollar maktaduai 50.4 a ni a, mipa leh hmeichhe singles champion-in an dawn tur chu $3,700,000 (Rs 23,80,52,450) niin tournament a tel phak chin hrim hrim hian $50,000 (Rs 32,16,925) an dawng dawn a ni.

US Tennis Association president Katrina Adams chuan, "Kum nga liam ta khan engtikah emaw chuan lawmman atan dollar maktaduai 50 kan sem chhuah tlin tur thu kan sawi a, kan thutiam kan hlen thei tur hi a lawmawm hle a ni," tiin a sawi.

Adams chuan sawi chhun­zawmin, "US Open-ah hian player bakah fans kan ngai pawimawh hle. Kumtin hmasawn zel kan tum a, inkhelhna tur court bakah hmunhma ṭhenkhat thawm ṭhat mek zel a ni, keini chuan tennis ngainatute hi khawvela a ṭha ber hlui hi kan thil tum a ni," a ti.

Season hmasa nena khaikhin chuan singles champion lawmman hi 7.5% in a pung a, doubles inelna huang chhung bika mi hi a punna chu 8.6% a ni bawk. Mipa leh hmeichhe doubles champion hian $675,000 ( Rs 4,34,19,375) an dawng dawn.

Kumin US Open hi a vawi 137-na tur a ni a, mipa singles champion lai chu Swiss tlangval Stan Wawrinka niin hmeichhe nomawi kawltu chu German star Angelique Kerber a ni thung.