Leeds Lakah Chelsea an Chuai
Premier League match thum an khelh tawhah Leeds United chuan tlawm an la nei lo. Jesse Marsch-a enkawl team hian an mikhual Chelsea 3-0 in an hneh a, point sarih an hlawh chhuak ta.
Nipui bazara pound maktaduai 170 chuang hmang tawhtu Chelsea lakah zawhna tam tak a awm nghal. Blues manager Thomas Tuchel-a'n champion thei team din a duh a nih chuan pawisa an hman belh leh a ngai dawn niin a lang.
Mendy tihsual
Pathianni zan Elland Road-a inkhelah pound maktaduai 50 man Sterling-a'n Leeds tlarhnung tan hna a siamsak zauh zauh a, goal pawh a khung - mahse VAR hman a nih hnuah a offside ngei tih hmuhchhuah a ni a, an hnawlsak.
Chelsea goalkeeper Edouard Mendy hun a thleng. A ṭhiante ball pek chu pet chhuak nghal mai loin a nghak, midfielder Brenden Aaronson-a'n hnaihchilh hmanin ball a chhuhsak a, minute 33-naah goal hmahruai a khung.
A goal aṭangin minute li chiah a liam hman, forward Sterling chuan box pawnah Marc Roca titluin freekick a chawi. Jack Harrison-a ball pet chu Rodrigo-a'n tun season a league goal li nan a tauh lut chiang hle.
Leeds captain Rodrigo hian second half-ah Harrison khung tur a siamsak ve bawk a, an goal thumna luh nana Daniel James hnathawh chu sawi hmaih theih a ni lo, box chhungah Chelsea defender tana ven harsa tur takin a vawrh lut a ni.
Mamawh an nei
Hliam vangin N'Golo Kante leh Mateo Kovacic te an khel thei lo. Jorginho thlawp turin Mason Mount leh Conor Gallagher te an awm - English midfielder pahnih hi player ṭha pangngai tak ni mah se Leeds midfielder-te aiin an chungnung lem lo.
Ruben Loftus-Cheek a khel ṭha pangngai viau, mahse damna thlen tur meuh chuan a thiam a tawi hret bawk. Hakim Ziyech leh Christian Pulisic te luh hnuah beisei an nei sang, amaherawhchu khaikhawmtu nei lo Blues midfield a buai tluan chhuak zak.
Tlarhma laia khel tur an la nei lo, forward Sterling leh Kai Havertz te a hmaah an ding - striker an nih lohna a lang leh ṭhin. Barcelona aṭanga Pierre-Emerick Aubameyang lak an tum pawh hi a mak lo, striker an mamawh tih a lang zel.
Buaina belhchhah turin Kalidou Koulibaly hnawhchhuah a ni a, kum 37 mi Thiago Silva hi EPL match zawng zawng khel tur chuan a upa tawh. Tuchel-a'n pawisa hmang tam tawh mah se, tlarhma leh a hnung lamah thuam ṭhat ngai a la nei.
Marsch-a Leeds
Kalvin Phillips leh Raphinha ten Manchester City leh Barcelona an pan a, a nihna takah chuan Leeds United midfield hi remkhawm harsa tak tura ngaih an ni, an goal nawrtu pawimawh leh midfield khaikhawmtu te an chân.
Mahse, Marsch-a'n hun rei vak lo chhungin team a siamrem hman. A tir aṭangin Tyler Adams chuan Conor Gallagher a awpbet nghal a, RB Salzburg aṭanga an lakluh Aaronson pawh a taima, goal hmasa ber an neih theih chhan pawh Thiago Silva-a backpass a um hram hram rah a ni.
Goal hnih nei hmasa mah se second half-ah chuan Chelsea kha tho chhuak thei tura rinna a la lian. Amaherawhchu, Diego Lorente leh Robin Koch te inkawp kha tlarhnung laiah an dingkhawng tlat a, keeper Illan Meslier-a'n a hna a tlin bawk.
Marsch-a nauten fans aṭangin thlawpna an dawng ṭha takzet bawk, an khelmual chu midang tana lenluh huphurhawm tak ni turin mipui lam thawm a bengchheng ṭha; Chelsea nen EPL match sarih an khel tawhah an chakna hmasa ber tawn kha an phu.
Nipui bazar chu a la inhawng ngei mai, a pawimawh zawk erawh kan neihsa aṭangin engtin nge hma kan sawn theih ang tih hi a ni. Ka ngaihdan chuan tuna kan team hmang hian Leeds United kha kan luchhuah thei em em eng. Midang an ṭhat bik em vang a ni hran lo, tihsual kan ngah vang a ni. A tir lam minute 20 chhung kha chu kan khel ṭha viau, a hnu lamah kan buai dan kha a mak zawk hle, khai aia remchang insiam hnem tur chu kan ni," - Thomas Tuchel, Chelsea Manager
Season hmasa kha chuan kan inkhelh dawn apiangin ka naute kha an hlauthawng ṭhin tih ka hria, tun season-ah erawh chu rilru chu a bo. Chelsea kha team ṭha tak an ni a, mahse ka naute khan an hlau miah lo tih inkhelh hma khan ka hre tawh. Inrintawkna kan nei a nih phawt chuan team lian hneh turin theihna kan nei. Stadium chhunga fans zai te khan min hneh, Leeds United an hmangaih thu an auchhuahpui khan chakna nasa tak min pe," - Jesse Marsch, Leeds United Manager