FIFA-in India hremna hlip dawn?

India rama dan rorelna sang ber Supreme Court chuan Indian football enkawl tura a ruat Committee of Administrators (CoA) chu a titawp ta a, FIFA-in India hremna a hlih beiseina a sang ta hle.

FIFA hian August 15 zanlai khan AIFF hnenah India an ban lailawk thu lehkha in an thawn a, India an ban chhan ber hi pawn lam mi (third party) CoA-in Indian football-in rel bawl dan a kalpui vang a ni.

Football khawvela thuneitu sang berin India a hrem hnuah AIFF hruaitu mai ni lo, sorkar laipui thlengin, hremna hi hlih a nih theih nan nasa taka hmalak a ni a, sorkar laipui chuan SC hi CoA hi titawp turin a ngen.

Nimin khan SC chuan sorkar ngenna hi ngai pawimawhin, CoA chu tihtawp a nih thu an puang a, AIFF President thlan hun tur pawh kar khata pawhsei a ni nghal bawk.

India tan
Justice D.Y. Chandrachud chuan, "Kan ramin FIFA Under 17 Women's World Cup a thlen tur leh international event-a player-te an inlan theihna tur rilrua dah reng chungin court chuan he thutlukna hi a siam a ni," a ti a, CoA an tihtawp chhan a sawi.

Court thu chhuak ang chuan Indian football kaihhruai hna hi AIFF administration lamin an thawk ang a, AIFF general secretary lailawk Sunando Dhar kaihhruaina hnuaiah an kal ang.

Hetihrual hian CoA ukil, senior advocate Gopal Sankaranarayanan chuan SC-ah hian Indian football case-ah amicus curiae (case thlan bika court puitu) hna a chelh chhunzawm ang a, court-in AIFF constitution a duan mek kawngah a pui dawn a ni.

India sorkar tana court hmaa inlan solicitor general Tushar Mehta chuan, "AIFF suspend-na hi kan ram pumpui leh player-te tan chuan chhiatna rapthlak tak a ni," a ti a, FIFA-in India hremna a hlih thuai a beisei.

Inthlan chu
Supreme Court chuan August 3 khan AIFF election buatsaih turin CoA chu a hriattir a, August 28-a inthlan buatsaih tur atan hian ram tana inlan tawh player langsar 36-in vote an neih theihna dan a tel.

Hei tak hi FIFA-in a duh loh langsar chu a ni a, India an ban zui. Mahse, SC thu chhuak thar ber erawh ngaihthlak a nuam ta a, AIFF chu inthlan buatsaih turin a ti a, inthlan hun tur pawh kar khata pawhsei a ni.

SC thu chhuak ang chuan AIFF executive committee-ah mi 23 an awm tur a ni a, chung zinga mi 17 chu AIFF hnuaia State & UT FA ten an thlan tur a ni dawn - hetah hian AIFF President, Treasurer leh Vice President an tel nghal ang.

Executive member dang paruk erawh Indian player chawl tawh aṭanga thlan tur a ni a, an zinga pali chu mipa an ni ang a, a bak pahnih erawh hmeichhia an nih a ṭul thung - hei tak hi FIFA-in a pawm thei ang em, hriat a châkawm.

AIFF President?
Indian football-a thuneitu sang ber AIFF-a President turin Bhaichung Bhutia, Dr. Shaji Prabhakaran, Kalyan Chaubey, NA Haris leh Ajit Banerjee te chuan an hming an thehlut tawh a, Bhaichung hian SC hnenah CoA-in AIFF constitution a duan chu a thlawp thu a sawi bawk.

India captain hlui Bhaichung tan hian dan hremi hriat hlawh tak Raghent Basant chu a ding a, FIFA aṭangin duh lohna awm mah se Supreme Court chu a thupek hmasaa ding turin a ngen a ni.

Bhaichung hian AIFF President a chuh dawn miau a, hei vang hian player tam zawkin vote an neih theihna dan tur, CoA-in a lo duan tawh chu a duh niin a lang. Court hian Bhutia ukil hi, "India-in World Cup a thlen tur hi chân se i duh em ni?" tiin a zawt.

Basant hian,"Kum li liam ta khan India hian U17 World Cup a thleng tawh. India football-in hma a sawn phah em? Khawvelah 104-na kan ni mek a, naupang pawh zawt ula, World Cup khelh chance kan neih lohzia an sawi ang. Tournament thlen ai chuan Indian football thlak danglam kan duh zawk," tiin a chhang - SC thuchhuak erawh Indian football fans tam zawk duhdan a ni a, a la ngaihnawm dawn chauh!