Tsitsipas hnehin Coric a champion

ATP Cincinnati Masters khelh zawh takah Borna Coric chuan Stefanos Tsitsipas hnehin nomawi a chawi. World number 152 Coric hian 7-6 (7/0), 6-2 in hnehna a chang a, a tan chuan title chhinchhiah tlak bik a ni ang.

A dar hliam vangin Coric hi season khat aia rei inkhel thei loin a awm, kumin March thla khan a lo kir ve leh chauh - a inkhelh loh rei avang hian a ranking pawh a hniam, Grand Slam dawta inelna ngaihhlut Masters title la thei ranking hniam ber a ni hial.

Greek tlangval Tsitsipas lakah Coric hi rinkai a ni lo, mahse darkar khat leh minute 57 an inkhelh chhungin a chungnung zawk a ni. Tun inelna bikah hian a match hmasa berah Rafael Nadal pawh a lo hneh tawh a ni.

Kum 25 mi Coric chuan, "Inkhel hautak leh hahthlak tak chu a ni. A tir lamah phei kha chuan min nawr na hle, harsa takin set khatna kha chu ka la hram. Set hnihna aṭang erawh chuan thil a danglam ta deuh, inkhel pawh ka thunun thei ta zawk," tiin a sawi.

Tennis season khat chhunga Grand Slam hnuhnung ber US Open atan inbuatsaihna chu a zo. August 29 aṭangin New York khawpuiah hard court inelna lian hi an khel dawn, inbuatsaihna nei ṭha Coric hi mipui mit fukna zinga mi a ni ang.

US Open-ah hian Nadal a inlan dawn a, world number 1 Daniil Medvedev leh Alexander Zverev te pawh an tel dawn. Novak Djokovic erawh hripui laka invenna vaccine a lak duh loh avangin a tan US-a zin luh theih a ni lo.