Newcastle 3-3 City: Goal ruk luhna inkhel hmuhnawm chu

Premier League-ah champion lai Manchester City-in Newcastle United lakah hnehna an chang thei lo a, 3-3 in an inhnehtawk. Goal ruk luhna inkhel hmuhnawmah City-in point hnih an hloh tihin sawi theih bawk mah se goal luh dan aṭanga teh chuan Pep Guardiola hote hian point khat an hlawh chhuak.

St James Park-a inkhelah hian Ilkay Gundogan hmangin City-in hma an hruai a, Magpies an zam phah lo - Miguel Almiron, Callum Wilson leh Kieran Trippier te hmangin an lehthal. Eddie Howe hote chak thei dinhmunah ding mah se an khingpui hi City an ni tlat. Champion lai tan Erling Haaland leh Bernardo Silva ten an khung a, 3-3 in inkhel a tawp.

Man City-in match thum khelhah point sarih an hmu a, point hnih an hloh avangin Arsenal chiah match thum khelha chak vek thei awmchhun an ni ta. Premier League table-ah Gunners chu a chung berah an awm a, City erawh an duh loh coach Mikel Arteta bakah player Gabriel Jesus leh Oleksandr Zinchenko te hnuaiah an lungawi rih a ṭul thung.

Champion lai nge nge
Manchester City inkhel a nung nghal a, Gundogan-a ball pek hmangin Haaland-a'n Newcastle United tlarhnung a rum ṭhaih nghal. Premier League champion laiin goal khung turin hun an mamawh rei lo.

Minute nganaah Bernardo Silva-a'n mual dinglamah hmun thawl a insiam a, fing takin box chhunah a pet lut. Ball hian Haaland a khum a, mahse box chhungah hian Norwegian striker chauh a awm lo - Gundogan a lo awm. German midfielder Gundogan hian ball la thlain ball sawt chu ṭha zetin a volley lut.

City-in goal hnihna khung theihna remchang an ni a, Haaland ke aṭanga ball ṭha chhuak chu Kevin de Bruyne-a'n a um lut. Belgian midfielder De Bruyne-a'n pass tur a neih loh avangin goal-ah a pet a, keeper Nick Pope-a'n a dansak.

Mi bum hmang Saint
Man City engtin nge goal an khung belh ang tih zawhna a awm thei a, mahse thil thlen dan erawh a danglam thung. Mualneitu Magpies-in inkhel an thunun zawk a, Allan Saint-Maximin chu player ṭha chungchuang tihin a sawi theih. Ani ngei hi mi bum hmam Saint chu a ni.

French forward Saint-Maximin chu City tlarhnungin an ngam lo a, a ball cross ṭha zet chu Almiron-a'n a pet over. Newcastle zawkin inkhel an thunun a, City buaina belhchhah turin defender Nathan Ake chu minute 21-na lekah Ruben Dias-a'n a thlak.

Saint-Maximin a hmuhnawm chhunzawm a, John Stones a bum hnuin goal-ah ṭha takin pet mah se Ederson-a'n a dansak. Minute 28-naah mualneituin goal an sual chhuak a, goal khungtu chu Almiron niin Saint-Maximin thawhrah bawk a mi.

Vei lam aṭanga Saint-Maximin cross chu Willock-a'n khawih pha lo mah se Almiron-a'n a su goal. Handball-ah ngaih a nih avangin goal lawmna au thawm a reh a, mah se VAR hmanga enlet hnuah tihsual hmuh a ni lo. Goal zawh hlim ang chiahin Almiron-a'n a goal khung a lawm nawn.

Newcastle an phur chhunzawm a, City buaina belhchhahin a awm. Saint-Maximin-a'n ṭha taka lalutin a ball fing tak chu Callum Wilson-a'n ṭha taka lak thlak hnuah a pet goal. Minute 39-naah 2-1 a ni a, first half-ah goal a luh belh lo.

Second half ṭantirhah Haaland-a'n goal ban a per a, City ṭha zawk an inlan dawn niin a lang. Mahse, first half ang thoin Saint-Maximin-a'n City tlarhnung a chhaih buai a, Stones lakah freekick a hlawh chhuak. Ball pet thiam vanga hriat hlawh sa Kieran Trippier-a'n minute 54-naah mawi zetin a pet goal - Ederson dem chi a ni lo.

City an ni tlat
Newcastle United-in darkar khat pawh tling loah goal thum an khung a, chak turah an inngai. Mahse Magpies mikhual hi City an ni a, Haaland leh De Bruyne telna a ni.

Minute 60-naah corner kick aṭanga ball kal zel chu Rodri-a'n tauh letin Haaland-a'n a volley goal. Minute li hnuah De Bruyne-a'n box chhungah ball fing pe lutin offside trap bumtu Bernardo Silva-a'n siphurh sutna goal a khung.

City an phur chhunzawm a, Haaland-a'n a chakna hmangin chance ṭha insiam thei mah se keeper Nick Pope-a'n a dansak. Norwegian striker hian hnai tak aṭangin a tlawh over bawk.

Red card a ni lo
Man City chu team ṭha zawk an nih miau avangin chak tura rin zawk an leh ta thung. Newcastle an buai a, buaina belhchhah thei turin minute 73-naah De Bruyne tlawhtu Trippier chu referee-in red card a pe nghal.

VAR hmangin thil thlen dan ennawn a ni a, referee-in mualsira monitor hmangin a en leh bawk. Trippier-a'n De Bruyne tlawh tluk ngawr ngawr aia ball a tum nia a lan avangin yellow card an pe ta zawk.

Magpies-in fiahna paltlang
Newcastle hi season liam ta khan relegation battle-ah an tel a, season tawp lam an hman ṭhat avangin harsa lutuk loin Premier League-ah an inhamtang. City erawh champion lai an ni a, club pahnih inkar a zau.

Mahse, Magpies hi nikum khan Saudi Public Investment Fund-in an lei a, club neitu hausakna hi pound tluklehdingawn 320 anga chhut a ni a, Man City neitu Sheikh Mansour (£22.9tld) nen a inthlau hle. Hemi a nih avang hian City hi Newcastle tan fiahna a ni.

Pep Guardiola hoten inkhelh hmain point khatah an lawm lo ang, inkhelh zawhah erawh point an hmuh avangin lawm tur an ni thung. Magpies hian 3-1 in hma an hruai hman a, City an buai takzet. Eddie Howe-a hoten an goal neih humhim thei lo mah se champion lai lakah point khat hlu bik an hlawh chhuak.

Newcastle-in fiahna an paltlang. Chutihrualin Magpies hi Man City laka an khelh ṭhat avangin champion sawi ri ngam tur erawh an la ni lo a, Champions League khelh phak pawh a la harsa ang.

Amaherawhchu Saudi Public Investment Fund thuneihna hnuaiah Magpies-in hma an sawn zel a, match thum khelhah chak loh la nei loin point nga an hmu a, paruknaah an awm.

Premier League a harsa - Pep
Manchester City leh Newcastle an inhnehtawk a, Pathianni zan inkhel dangah champion thei tura sawi tel zinga mi Chelsea chu Leeds United lakah an mualpho.

City manager Pep Guardiola chuan, "Chak lo thei dinhmunah kan ding. Leeds-in Chelsea an hneh. Tu tan pawh Premier League hi chu a harsa a ni. Kan hnathawh tawh ropuizia min hriat nawn tir a, kan hmabak pawh a harsa dawn. Ka nauten a tawp thlengin theihtawp an chhuah a, a lungawithlak a ni," tiin Premier League harsatzia a sawi.

Newcastle-in Premier League an tih harsat belh a, club neituten sum an ngah miau avangin kum a vei leh deuh chuan 'Big 6' huang zauhin 'big 7' ah an thlak thei hial ang. Magpies manager Eddie Howie chuan, "Bul kan ṭan chhia a, kan duh angin kan khel thei lo. Goal kan khung khan pressure a la kiam a, halftime tawp dawn hnaihah phei chuan kan khel ṭha hle.

"Kan rilru put hmang a dik a, huaisenna leh tumna kan nei bawk. Goal venhima beh tawp tum loin pressure kan pe a, ka player-ten hna an thawk ṭha. A tawpah erawh khelh ṭhat ringawt a tawk lo a, result a pawimawh," tiin point an hlawhchhuah avanga a lawmthu a sawi.