Hei le - Lewandowski a lo lang e!
Robert Lewandowski chuan goal nen a kum 34 tlin a lawm a, Barcelona chu Real Sociedad lakah 4-1 in hnehna a chanpui - goal hnih a khung.
Bayern Munich aṭanga Barcelona pantu striker hian Sociedad laka goal khung turin hun a mamawh rei lo - second 47-na lekah Barca rawlthar duhawm Alejandro Balde siamsak chu goal-ah a chantir.
Polish striker-in goal a khung hnuah Sociedad hian tlawm an tum bik lo tih an pholang a, minute rukna lekah player chhuanvawr Alexander Isak hmangin an si phurh an sut ve leh zui.
Goal dang awm loin chawlhlawk hman a ni a, mahse, second half-ah Lewy chuan a goal hnihna khungin Ousmane Dembele leh Ansu Fati ten goal khat ve ve an khung bawk a, Barca an chak.
Barca tan lawmna
Nipui transfer-a sum tam tak seng chungin Barcelona-in an league match hmasa berah Rayo Vallecano chu an inhnehtawkpui a, an match hnihnaah goal li ngawt an khung avangin an hlim khawp ang.
Lewy-a'n Bayern Munich-ah a phu ang tawka zahna a dawng loa inngaiin, hlawh tlem zawk hlawh turin club talbuai Barca a pan a, pound maktaduai 42 man striker hian a competitive match hmasa berah goal khung lo mah se a vawi hnihnaah chuan a khung ta - kan la hmu dawn chauh.
Barca-in sum nei lo tak chungin Xavi enkawlna hnuaia vul thar Dembele an chelh a, contract thar an ziahpui - French forward-in goal a khung ve leh ta bawk a, Barca lawmna belhchhah a ni.
Catalan club hian Nilaini zan dar 1:00-ah Manchester City nen friendly match an khel ang a, August 28-ah Real Valladolid an mikhual zui ang.
A hming Fati
Barca hian season hmasa khan hliam vangin an chhuanvawr Fati an chhawr mumal thei lo - kuminah erawh a lo kir leh ta a, Lionel Messi kalsan tak number 10 hatu forward hian goal a khung ve bakah Lewy (goal hnihna) leh Dembele goal khung tur a assist bawk.
Catalan club-in match hnih an khelh aṭangin point li an nei ta a, an elpui ber Real Madrid erawh match hnih an khelhah an chak ve ve thung. Hetihlai hian Atletico Madrid erawh Pathianni zan khan an tlawm!
Diego Simeone enkawl team hian an match hmasa berah hnehna chang mah se Pathianni zan khan Villarreal chu 2-0 in an ngam lo a, mikhual team tan hian rawlthar beiseiawm Yeremy Pino leh Gerard Moreno ten goal khat ve ve an khung.
Goal luh hmain Atletico tan Matheus Cunha chuan chance duhawm nei mah se a chhawr thei lo a, si phurh sut an mamawh em em laiin hun pek belhah right back Nahuel Molina chu hnawhchhuah a ni bawk - Unai Emery enkawl Villarreal-in a zawna vawi hnih an chakna ni turin hnehna an chang.