Anthony Joshua a inchhir

Oleksandr Usyk laka tlawm hlim Anthony Joshua chuan Ukrainian boxer nen an inhnek zawha a chet dan avangin ngaihdam a dil a, a tihsual a nih thu a sawi.

Joshua hian Usyk a ngam loh hnuah a khingpui belt pahnih chu laksakin, ring pawnah a paih a, dressing room a pan zui - a lo kir leh a, mumal lo takin thil a sawi ṭeuh!

Kum 32 mi Joshua hian ring a luh leh hnuah Usyk hi panin, "Mi chak i ni si lo a, engtinnge min hneh theih? Engtinnge? Chak duhna leh tuihalna ka nei zawk asin," a ti a, thil dang a sawi nual bawk.

Joshua chuan, "Ka duhdan angin ka awm lo a ni," a ti a, press conference-ah a duhdan anga a khelh chhuah loh avanga talbuai a nih thu sawiin, "Thinrim chang chuan âtthlak taka chet a awlsam ṭhin a ni," a ti.

British boxer rothap hian twitter-ah pawh a ngaihdam dilna tarlangin, "Usyk, ropuina pana i kalkawngah hlawhtlinna i chan ka duhsak che. Champion belt hlawh chhuak turin hmun harsa ka pan a, fight pahnih ka hmachhawn - pakhat chu Usyk nen a ni a, pakhat erawh ka rilru nen a ni a, ka tlawm ve ve a ni," a ti a, a inthiam lo hle.

Joshua chuan sawi zawmin, "Ka tih loh tawp tur ka ti a ni. Ka rilru a buai a, ka thunun zo lo a ni. He infiamna hi ka hmangaih takzet a, tun aṭang chuan ka insiamṭha ang," a ti.

London 2012-a super-heavyweight Olympic gold medal hlawh chhuaktu hian professional fight a hmachhawn hmasak 22-ah hnehna a chang vek a, mahse, a match hnuhnung pangaah vawi thum a tlawm thung - title inchuhna fight vek a ni.

Hetihlai hian Joshua hian December-ah fight neih lehnghal a beisei a, promoter Eddie Hearn chuan nakkum bikah fight pathum emaw pali tal nei hman turin a duh.

Joshua chuan, "Eddie nen kan inbia a, November-a inhnek leh ka duh thu hrilh mah ila, December nghak turin min ti. Min fight duh apiang chu lo kal rawh u," tiin insiamṭhat a tum hle.