Goal sur tirtu Paris Saint Germain

Paris Saint Germain nihna tak tak kan hmu chho thei dawn ta niin a lang. Lionel Messi, Neymar leh Kylian Mbappe te awmna team hian goal khung chu an chaw tui ber a ni ta - Pathianni zan khan Lille chu 7-1 teh meuhin an sawp.

Inkhel ṭan aṭanga second riatna lekah goal kan hmu nghal. Mbappe-a'n a khung nghal der, hla tak aṭanga ball fing petu Messi inrawlh dan a thuk hle - France international hi PSG tana goal khung rang ber record siamtu a ni nghal.

Paris club tana goal rang ber record hmasa chu kum 1993 ami daih tawh kha a ni. Paul Le Guen chuan Apoel Nicosia lakah second 13-na lekah goal a khung, record hmasa hi Mbappe chuan a rawn khum ta a ni.

Mbappe goal tur siamsaktu Messi-a'n a khung chhunzawm a, a khat tawkin goal dang pawh a lut reng. Mbappe-a'n hattrick siamin, season hmang ṭha Neymar chuan goal hnih a khung bakah Achraf Hakimi-a'n a thawh ve bawk.

Tun hnaiah PSG tlarhmate hi an innghirngho deuh nia sawi a ni a, video ṭhenkhat pawh hmuh tur a awm. Lille lakah erawh an inkawp rem takzet - Neymar hian Mbappe goal hnuhnung pahnih hi a siamsak a ni a, Brazilian forward bawk hi Hakimi tana assist tu pawh a ni.

Neymar-a'n tun season Ligue 1 bikah goal nga a khung ta a, assist vawi ruk a nei tawh bawk. Brazil coach Tite-a'n, "World Cup kan chawi chuan Neymar hian Ballon d'Or a dawng ang," tiin a lo sawi tawh, tunlai a khelh dan nen chuan a inmil rih viau.

PSG coach Christophe Galtier chuan, "Result ṭha tak a ni, team pumpui kan khel ṭha. Mimala khel ṭha an awm hian a lawmawm zual ṭhin, chu chuan team a tichak a ni. Kan hmatawng ten goal an mamawh hnem, match dangah pawh hetiang hi kan beisei tur a ni ang," tiin a sawi.