Garcia tan duhthusam a thleng dik

Caroline Garcia chuan a naupan lai aṭanga a suangtuah ṭhin, mumanga a hmuh ṭhin chu a takin a tawng. French nula hian Petra Kvitova chu 6-2, 6-4 a hnehin Cincinnati Masters champion a ni.

Kum 28 mi Garcia ranking a sang lo, seeded a chang phak lo. Main draw khel nghal tur pawhin a ranking a la sang zo chuang lo, mahse tunah chuan qualifying aṭanga khel ṭan zingah WTA 1000 title la thei hmasa ber a ni hial.

Garcia hi a danglam angreng, tun hmain Wuhan leh Beijing-ah a zawnin Masters title a lo la tawh, nomawi lian tham pahnih a chawi aṭang hian kum nga deuhthaw a liam tawh, tun kara ranking chhuak tharah chuan number 35 aṭangin a sang zual 20 zingah a tel tawh ang.

Qualifying aṭanga a in vuak tlin hnuah Garcia hian ranking sang 10 china mi Maria Sakkari, Aryna Sabalenka leh Jessica Pegula te a hneh a, Wimbledon vawi hnih champion tawh Kvitova a hneh leh bawk avangin champion a phu hle.

Tennis season kal laiah match 33 a chak tling ta a, ani aia chak hnem chu Iga Swiatek (50), Simona Halep (39) leh Ons Jabeur (38) te chauh an ni. Kar leh aṭanga khelh tur US Open-ah pawh beisei a nei sang ang.