AC Milan an chak zo lo

Serie A champion AC Milan chu Pathianni zan khan Atalanta nen 1-1 in an inhnehtawk, match hnih an khelh aṭanga point li an hmuh avangin hmahruaitu an ni thei lo - Inter Milan leh Napoli ten point ruk ve ve an hmu tawh.

Atalanta midfielder Ruslan Malinovskyi goal khung chu Ismael Bennacer-a'n a sut a, goal dang a lut zui lo. Goal mamawh hunah Olivier Giroud dah luh a ni a, France international hian chakna goal erawh a pai tel reng bik lo.

Stefano Pioli naute hian season hmasa khan Serie A nomawi an chawi, kum 11 hnua an champion lehna hmasa ber a ni hial. 1992-93 leh 1993-94 hnua a vawi khat nan a zawna champion an tum, an hna erawh a hautak dawn.

AC Milan coach Pioli chuan, "Atalanta khan an theihtawp tak meuhin an khel a, khatiang taka min bei chung khan goal khung theihna remchang kan pe mang lo. Goal khat chu chhuah mah ila kan chhanglet ve tho, league-ah chuan point khata kan lungawi a ṭul chang a awm.

"Chakna goal kan khung theih loh avang erawh chuan ka ui viau, match dangah chuan kan tlarhma ten hna an thawk leh ang," a ti. Hliam vangin Zlatan Ibrahimovic a chawl mek a, tawnhriat nei ṭha Giroud pawh hliam damkawr a la ni bawk.

Inkhel dangah Napoli erawhin kai thar Monza an dim lo hle. Naples club hian Khvicha Kvaratskhelia-a goal hnih bakah, Victor Osimhen leh Kim Min-jae te goal hmangin 4-0 in hnehna an chang a, beisei phak baka ṭhain season bul an ṭan.