Bayern tan Bundesliga a awlsam

German champion Bayern Munich-in an goal khung khawl Robert Lewandowski chân mah se goal khung kawngah harsatna an tawh phah lo a, Pathianni zan khan league match-ah VfL Bochum chu 7-0 ngawtin an sawp.

Bayern tan pound maktaduai 27.4-a Liverpol aṭanga an lakluh Sadio Mané chuan goal hnih a khung a, goal khat hi penalty aṭanga a chhuih luh a ni - Liverpool-a a pet phak loh penalty pettuah German club-in an hmang.

Kum 30 mi Mane hian Bayern a pan hnuah match li khel tawhin goal li a khung tling der a, German club tan hian kar hmasa lawka Wolsburg laka goal a khung lo tih loh kha chu match a khelhah goal a la khung zel a ni.

Bayern tan hian Leroy Sane chuan goal hmahruai khungin, nipui transfer-a lakluh Matthijs de Ligt leh Kingsley Coman ten khung ve lehin, Mane-a'n first half bik atan a hmawr a bawk.

Second half-ah penalty hmangin Mane-a'n goal khung a ṭan ve thung a, Serge Gnabry chuan a hmawr a bawk - Bayern-in goal khungpui an mamawh loh tehlul nen, player pahnih goal khung karah hian Bochum right back Cristian Gamboa chuan an lamah a tilut!

Bayern hian tun season-ah league match thum khelin an la chak vek a, goal 15 zet khungin an lamah goal khat chiah a la lut thung - an tan Bundesliga a awlsam hret niin a lang.