Chhinga Veng hmaah Venghlui ; Police leh Chanmari West an insu dawn

Lalbiakliana Memorial MFA Super Cup semifinal chu vawiin hian khelh a ni dawn a, tualchhung football ngainatute tan Lammual pan hun a ni.

Transfer laia thawm nei lian Chhinga Veng FC-in chawhnu dar 1:00-ah first division club la dam awm chhun Venghlui FC an hmachhawn dawn a, MPL club hi chak tura rinkai an ni.

Tlai dar 3:30-ah MPL club pahnih Mizoram Police FC leh Chanmari West FC te an insu ang.

Rs 60,000 inchuhna
MFA Super Cup-a pawisa sem ral zat tura an ruahhman dan chu Rs 4,50,000 a ni a, hming ṭhatna baka sum hui lut turin chak a pawimawh.

Champion team-in Rs 2,00,000 zet an dawng dawn a, pahnihnain Rs 80,000 an dawng thung dawn. Vawiin inkhela chak lo zawk pawh hian semifinal an thlen tawh avangin Rs 20,000 an dawng dawn a, amaherawhchu final an thlen phak chuan an pawisa dawn hi a let thumin a pung ang.

Vawiinah hian final luh tumin an inkhel dawn a, Rs 60,000 inchuhna a nih tel avangin inkhel a hmuhnawm ngei beisei a ni.

Chhungkua an ni - Sanga
Mizo coach thawkrim Lal­sang­zuala Hmar-in MFA Super Cup-a Lammual inkhel a la en kim deuh vek a, player ṭha rual enkawltu hian first division club Venghlui FC hi a dah sang hle.

Chhinga Veng coach Sanga chuan, "MPL club pawh tiam vekin Lammuala inlan tawh team zingah chuan Venghlui FC hi chhungkaw ṭangrual ang maia thawhhona ṭha a ni," tiin Vanglaini a hrilh a. Amaherawhchu MPL club hian player ṭha an sengluh hnem avangin chak tura ngaih an ni.

Venghlui FC hian nikum khan quarterfinal an thleng a, an match hmasa berah I Day Football finalist Ramhlun North FC an hneh nghal. Kumin hian MPL club la hmachhawn lo mah se match li an khelh tawh aṭangin goal 21 an khung.

First division club forward Vanrammawia Ngente (9 Goals) leh K. Roluahpuia (4) ten match tinah goal an khung vek a, an pahniha an khung zat ringawt pawh hi goal 13 a ni.

Venghlui FC manager C. Zohmingliana chuan, "MPL club an nih avangin an ṭha tih kan hria a, amaherawhchu kan khelh dan ngai bawkin kan khel ang. MPL club lakah hian beiseina kan nei a, veng mipui min ṭawiawm turin kan sawm bawk," tiin final thlen ngei a tum thu a sawi.

Chhinga Veng tan tlarhmaa awm Malsawmfela leh Laldam­puia ten goal sarih ve ve an khung tawh a, goal nga khung tawh MS Dawngliana an nei bawk. Venghlui FC tlarhnunga awm Robert Lalhruaitluanga, Vanlallawma, Lalropuia leh H. Lalrohlupuia-te ṭum dang zawng aia an ṭan khawng a ṭul ang.

Chhingcows hian player an neih ṭhat bakah ṭantu an nei ṭha a, coach Sanga pawhin, "A tir phat aṭangin ṭantu kan nei ṭha thei hi ka lawm a, semifinal-ah pawh khelmual chhung leh pawn lamah theihtawp kan chhuah leh ang," tiin a sawi.

Police vs West Warrior
Mizoram Police leh Chan­mari West-te hi tlai dar 3:30-a inkhel tur an nih avangin neutral supporter pawh an tam tawh ang.

Police-in semifinal kal­kawng­ah Aizawl FC leh AFC Academy an hneh a, vanneih vang a ni lo - inpuahchahna neih ṭhat vang a ni.

Coach Ṭial­thawnga'n thutlukna huai­sen siamin veteran keeper Vanlalhriata thlak nan keeper Lalṭan­puia a hmang a, Ramhlun North tlangval zarah Police tlarhnung a phui phah hle.

Tlarhnungah tawnhriat nei ṭha an tam a, amaherawhchu ṭuan rang an mamawhna a san avangin 1st Bn MAP Football Academy chhuak Lalruatpuia an chhawr ngam a, Lalhmunmawia a puitlin tawh bawk avangin an tlarhnung hi tunah la phui lo mah se a ṭha chho zel turin theihna a awm. Police tlarhma erawh sawi nawn ngai loa ṭha an nih avangin West Warrior tan buaina tham a tling ang.

Chanmari West-in semifinal kalkawngah Dinthar FC an hneh a, nomawi keng tel coach anga hiala sawi theih HC Zarzoliana hote hi dah hniam theih an ni lo.

West Warrior-in midfield thuam chak nana an lakluh langsar Tlungvel tlangval Jacob Lalrawngbawla chu ball pet a thiam avangin khel­mualah pawh a langsar a; player thar dang rawlthar Lalromawia chu midfield-ah a ṭangkai takzet.

Chanmari West hian tlarhma lam pawh an nei ṭha a, Police nena an danglamna chu 'ṭha tawh aiin la ṭha tur' an tam. Chung zingah chuan Ramhlun South rawlthar pahnih Lalremruata leh R. Lalthanmawia bakah Hnahthial rawlthar C. Lalremruata te an ṭangkai a, tawnhriat nei tawh captain Lalnunmawia leh a nau Vanlalthlamuana te nen an goal nawr a na ang.

Police midfieler thawkrim pahnih V. Lalṭanpuia leh Lal­ramtharmawia ten yellow card an hmu tawh a, West Warrior lamah Calvin Zonunsiama, Ronald Zothanzama leh Amawia ten yellow card an hmu tawh bawk a, final an khel duh a nih chuan an fimkhur a ṭul dawn a ni.