Player duh belh Jose Mourinho

Manchester United manager Jose Mourinho chuan a squad ti chak turin player thar lak belh a la duh thu a sawi chhuak a, player manto uchuak lutuk chu buaina a tlin thu a sawi tel bawk.

Man United hian tun nipui transfer chungin Everton striker Romelu Lukaku (£75m) leh Ben-fica defender Victor Lin-delof (£31m) te an lalut tawh a, Inter Milan aṭangin mid-fielder Ivan Perisic lakluh an la duh bawk.

Mahse, Italian club hian kum 28 mi Perisic hi pound maktaduai 48 aia tlemin an chhuah phal lo a, hei bakah hian Anthony Martial neih let ve thung an duh bawk.

Mourinho chuan, "Tunah hian club dangin an player man an chhiarna zat ang apiang pe thei dinhmunah kan ding lo. Player ṭha bik chu to takin kan lei thei a, a ṭha vantlang erawh to uchuak taka lei vek a rem lo," tiin a sawi.

Chelsea manager hlui chuan sawi chhunzawmin, "Kan squad hi kan en chuan a la chhah tawk lo tih kan hmu vek ang. Player pali vel lakluh ka duh a, mahse transfer bazar hi a harsat em avangin pathum neih belh pawh a pawi lo zawk," a ti.

United player langsar zingah Luke Shaw, Marcos Rojo leh Ashley Young te chu hliam vangin an zin ve thei lo a, Real Salt Lake 2-1 a an hneh ṭuma inhliam Juan Mata pawh inkhel turin a la inpeih lo.

United hi season thar inbuatsaih nan United States lamah an zin mek a, tukin dar 7:30 hian NRG Stadium, Houston-ah league lama an elpui Manchester City nen an inkhel ang - inkhel hi Ten 2-ah live tur a ni.

Kum 54 mi Mourinho chuan City nena an inkhel tur chu 'training session' tiin a sawi a, boruak sang lo tur tihna erawh a ni kher lo. Manchester club pahnihte hi season hmasa ṭan dawn khan Bird's Nest Stadium, China-ah inkhel tur an ni a, khua in a bumro avangin an ṭhulh.