World Championship hnuah Bolt a chawl dawn

Khawvela tlan chak ber Usain Bolt chuan August thla a neih tur World Championship-ah a inlan tur thu a ti­chiang a, infiamna khawm­pui lianah hian 100m leh 4x100m relay a hmachhawn ang. Jamaican sprinter ropui hian he inelna hi a tan hun hnuhnung a nih tur thu a sawi.

Kum 30 mi Bolt chuan, "Ka thil tum chu London-a hnehna chan a ni a, hnehna hlado cham chung ngeia infiamna chawlhsan ka duh a ni," a ti. World Cham­­pionship hi August 4-13 chhungin London Stadium-ah neih tur a ni ang.

World Championship mipa 100m intlansiak final hi August 5, Inrin­niah tlan tur a ni a, 4x100m erawh August 12-ah tlan a ni thung ang. World Championship inbuatsaih nan hian tunkar tawp a neih tur Diamond League-ah 100m intlansiakah a inlan dawn bawk a ni.

Bolt hian Olymic hnu­hnung pathum Beijing, London leh Ruio-ah khan 100m, 200m leh 4x100m intlansiakah gold medal a hui vek. Mahse, China khawpuia an intlansiak ṭum hian 4x100m huanga an teammate Nesta Car­ter chu damdawi hman phal loh a hmang tih hmuh­chhuah a nih avangin gold medal pakhat hi an lak let sak.

June thla khan Bolt hian an ram (Jamaica)-ah a hun hnuhnung ber atan 100m a tlan a, second 10.03 chhunga thlengin pakhatna a ni. Jamaica ram mipuite chuan mittui nen an legend hun hnuhnung hi an lo hman pui tawh a ni.

World champion vawi 11 ni tawh Bolt hian 2009 Berlin World Championship-ah khan 100m (9.58 seconds) leh 200m (19.19 seconds) chunga thlengin world record a siam a, tun thlengin he record hi khum thei an la awm lo.