Hammers-ah United Striker hlui Hernandez?

West Ham chuan German club Bayer Leverkusen aṭangin Mexican international Javier Hernandez an lalut ngei dawn niin a lang tawh, Manchester United striker hlui man zat tur erawh tarlan a la ni rih lo.

Kum 29 mi Hernandez hian United tan match 156-a khelhah goal 59 a khung a, hetichung hian hmun lailum a chan theih mumal loh avangin kum 2015 August thla khan Old Trafford chhuhsanin Germany a pan. Bundesliga club tan inelna hrang hrangah match 76 a khelh aṭangin goal 39 a khung leh tawh a ni.

Hernandez hian an ram Mexico tan match 96 a khelh aṭangin goal 48 a khung tawh a, an ram tana goal khung hnem ber record kawl mektu a ni.

Season hmasa a beisei phak lo Hammers an inla muk mek zel. Manchester City goalkeeper Joe Hart chu season khat chhung atan loan hmangin an hawh fel tawh a, an elpui Stoke City aṭangin Austria forward Marko Arnautovic chu pound maktaduai 24-a lalut turin inremna an siam tawh bawk.