City leh Chelsea-in Danilo an duh
Premier League club lian pahnih Manchester City leh Chelsea chuan pound maktaduai 26 man Real Madrid right back Danilo lakluh tumin an dawr mek.
City manager Pep Guardiola chuan Danilo hi full back bakah midfield-a chhawr theih a nih bawk avangin a duh nia sawi a ni a, Antonio Conte hian tlarhnung an chak lohna lai thawm ṭhat nan a duh niin an sawi bawk.
Duhtawk lo City
Kum 26-a upa Danilo hian kum 2015 khan FC Porto aṭangin Real Madrid hi a zawm a, mah se Spanish club-ah first choice right back ni turin Dani Carvajal a nek chhuak zo lo. Brazilian defender hian season hman zawh takah khan league match 17 a khel a, game lian thamah Carvajal chu Zinedine Zidane-a rin zawk a ni.
City hian nipui transfer-ah player pali - goalkeeper Ederson Moraes, right back Kyle Walker, winger Bernardo Silva leh rawlthar midfielder Douglas Luiz an lalut tawh a, manager Pep Guardiola chuan an la duhtawk loh thu a sawi.
Spanish manager chuan, "Player pathum emaw pali tal lakluh kan la tum a, tuna kan biak mekte hi chu player naupang tak tak niin tun aṭanga kum nga lo awm tur thlir lawk chunga kan dawrte an ni. Tun dinhmunah chuan player hming ka la sawi thei lo a, an hming ka sawi chuan an club ka zah lohna a ni ang," a ti a, Monaco left back Benjamin Mendy lakluh tum anga an sawina pawh a sawi belh duh lo.
Chhuak lo tur Aguero
Manchester City striker Sergio Aguero chu Chelsea-in lakluh an duh nia sawi a ni a, mahse London club hian Real striker Alvaro Morata chu inremna an neihpui tawh avangin Aguero hi an beisei chhunzawm kher a rinawm loh a, City boss Pep chuan a striker hi a chhuah loh tur thu a sawi chiang bawk.
Pep chuan season hmasaa league goal 20 khungtu chu, "Kan player a ni a, kan hnenah a cham chhunzawm zel ang," a ti a, hetihrual hian rawlthar striker Kelechi Iheanacho tan chhuah a ṭhat zawk thu a sawi tel bawk. Nigerian striker hian pound maktaduai 26-in Leicester City a zawm dawn.
Guardiola chuan City tan match 64-a goal 21 khungtu chu, "Player naupang tak a ni a, a tan a awlsam lo a ni. A kum ang zatah chuan inkhelh tam a mamawh a, chuvangin a chhuah mai hi a ṭha a ni," tiin a sawi a, Stoke City-a loan a hmanna aṭanga Etihad-a kir leh tawh Wilfried Bony chu a inhliam vanga pre-season a hruai lo an nih thu a sawi.