Chelsea player manto ber Morata

Premier League champion Chelsea chu Alvaro Morata lalut turin Real Madrid nen an inrem a, Spanish striker man zat hi pound maktaduai 58 niin Blues player manto ber a ni ang.

Kum 2011 khan Chelsea-in Liverpool aṭangin pound maktaduai 50-in Fernando Torres an lalut a, Morata man hian transfer fee record awm sa chu chiang takin a khum. Juventus striker hlui man zat hi a khelh ṭhat dan a zirin pound maktaduai 70 thlenga pung chho thei tur a ni.

Lukaku aiah Morata

Chelsea manager Antonio Conte leh an striker Diego Costa an inhmu thiam lo a, Italian manager hian Costa hnenah hmun pawimawh a chan loh tur thu a hrilh. Hei vang hian London club hian striker hming langsar an la dawn tih a chiang a, an duh ber chu Jose Mourinho hun laia an chhuahtir Romelu Lukaku a ni.

Blues-in Belgian forward Lukaku an chang ngei dawna a lan hnuah Manchester United an rawn lang a, pound maktaduai 75 baka add-ons a pound maktaduai 15 theh chhuak phal Mourinho hoten hnehna an chang. Premier League champion-in loh theih loin player dang an melh a ngai a, Morata lakah an lungawi a ṭul ta a ni.

Lawmna tham

Chelsea hian Lukaku aia Morata an lakluh avangin pound maktaduai 17 bawr vel an hlep thei a, Spanish striker hi thiamna lamah pawh Lukaku tluk pui a nih loh pawhin a ai maha ṭha tura ngaih a ni.

Blues winger hlui Pat Nevin chuan, "Lak tur dang awm thlawt loh vanga lalut an ni lo a, an mamawh leh an duh tak a ni," tiin a khelhna hlui chuan an tihfuh thu a sawi.

Chelsea manager Conte hi Costa nena an inhmuh thiam loh avangin club hotute nena an inkar a khi niin sawi thawm a awm a, Italian manager hi Lukaku an chan loh avangin a lungawi lo niin tarlan a awm bawk. Amaherawhchu tunah chuan Blues manager hian a contract neih sa chu hlawh tam zawk hmu turin kum hnih atan a ziak ṭha a, hei hian London club boruak a ṭha tih a pholang.

Nevin chuan, "Conte-a'n contract thar a ziah chiah khan team kaihruai turin a rilru zawng zawng a pe tih a pholang a, thla khat liam taa boruak awm dan nen a danglam tawh. Tuna Morata a luh leh takah chuan Chelsea ṭantute chuan lawm avangin boruak an hnek ngei ang," tiin Chelsea chu an nomawi hum­him tura an inpeih thu a sawi.

European football journalist lar Mina Rzouki pawhin a ngaihdan sawiin, "Lukaku leh Morata hi min zawrh se inngaihtuah buai a ngai lo ang. Morata lalut tur hian pound maktaduai 20-30 ka pek belh duh hial ang. Ka thlan zawk chhan chu player fing hi ka dah pawimawh a, midang a thlawp thiam a, counter attack-ah a

ṭha em em bawk. Real Madrid-ah starting eleven a chang pha lo chungin goal khung tam ber dawttu a ni thei a, Juventus leh Real Madrid tan Champions League-ah tawnhriat a nei bawk," tiin Morata a dah sang hle.

Tu nge Morata?

Morata hian kum 2008 khan Real Madrid youth team a zawm a, kum 18 leka upa a nihin kum 2010 khan senior team tan a khel ṭan.

Feet ruk leh inches thuma sang striker hian kum 2014 khan Juventus a zawm a, kum hnih chhungin goal 27 a khung sak a. Juve hi Serie A leh Coppa Italia-ah vawi hnih ve ve champion puiin Champions League final a thlenpui bawk.

Season liam ta khan Real Madrid-ah letin league-ah goal 15 a khung a, khelmuala a hun hman zat aṭanga chhut chuan La Liga-ah Lionel Messi chiah a tluk lo. Morata hian khelhna hmun tam zawk a duh a, Real tan league-ah vawi 26 chiah a inlan a, chung zinga vawi 14-ah inkhel bul ṭanin vawi nga chiah a khel tluan a, vawi 12 dang chu bench aṭangin a lut.

Chelsea nena a chian hma hian Spanish striker Morata chuan, "Ka chunga rinna nghat ngam ber coach hnenah ka kal dawn a, ka tan chuan hei hi a hlu a ni," tiin a sawi a, Blues-ah rinrawl a ni ang.

Hmabak nomawi?

Blues coach Conte-a'n cham­pion pui tham team a nei tih season liam ta khan a pholang a, season tharah nomawi humhim tur leh Champions League-a nomawi chuh pha turin player an lakluh belh bawk.

Chelsea hian Morata hma hian goalkeeper Willy Caballero, defender Antonio Rudiger leh midfielder Tiemoue Bakayoko te an lalut tawh a, tun thlenga an sum sen hi pound maktaduai 130 a tling pha hial tawh a ni.