Wimbledon leh French Open chhui dawn

Tennis inelna ngaihhlut Wimbledon leh French Open-a inkhel ṭhenkhat chu thil dik tawk lo a awmnia hriat a nih avangin Tennis Integrity Unit (TIU) lamin an chhui chiang dawn tih an sawi.

Inkhel chhui tur hi Wimbledon match thum leh Roland Garros-a match pakhat a ni. TIU chuan kumin April leh June thla inkarah thubuai ngaihven ngai 53 zet an dawng a, heng zinga pathum chu mipa inelna ATP Tour hnuai mi niin a dang pakhat chu hmeichhe lam WTA Tour a ni thung.

TIU chuan, "Buaina kan ngaihtuah tur zinga hian match-fixing a awm lo, a langsar ṭhenkhat chu player fitness ṭha lo chunga khel lui a awm leh awm loh chungchang vel a ni ber," an ti. TIU hian season hmasa lam khan kum chanve hmalam chhungin thubuai 83 an dawng hman a, kuminah chuan 38 zetin a tlahniam tawh a ni.