Nomawi chawi tura City pantu Walker

Manchester City defender thar Kyle Walker chuan Tottenham Hotspur chhuahsana Manchester City a pan chhan chu champion nomawi chawi a duh vang a ni thu a sawi. Spurs-in season hnih liam taah Premier League-ah top three-a awm chungin season an khar ve ve a, mahse inelna lianthama champion nomawi an chawi hnuhnung ber erawh kum kua kal ta khan a ni tawh.

Pound maktaduai 50 thlenga a man sang chho thei tur defender chuan, "City-a world class player kan neihdante thlirin he hmunah hian champion nomawi kan chawi ngei ka beisei a, chu chu ka career-a tawn ka chak ber pawh a ni," a ti.

Spurs hian season hman zawh takah FA Cup semifinal an lut a, mahse Chelsea lakah an tlawm. Kum 2015 League Cup final-ah khan Blues lakah hian an lo tlawm tawh bawk a, nomawi an chawi hnuhnung ber chu kum 2008-a League Cup an chawi kha a ni.

Kum 2009-a Spurs zawmtu Walker chuan, "A chang chuan kan vanduai a, mahse keimahni berin kan tih ṭhat tawk loh vang pawh a ni tel ṭhin," tiin White Hart Lane-a nomawi an chawi theih loh chhan a sawi.

City hian Walker man zatah hian pound maktaduai 45 an pe phawt a, a khelh ṭhat dan a zira pound maktaduai 50-a sang chho leh thei tura ruahmanna siam a ni. City hian pound maktaduai 50 hi an pe a nih chuan Walker hian khawvela defender manto ber ni tura David Luiz-a'n kum 2014-a Chelsea aṭanga Paris St-Germain a panna man zat kha a nihrualpui dawn tihna a ni.

Walker chuan a man chu a to tih pawmin, "Pawisa tam tak a ni a, mah se hei vang hian ka buai lo. Chona thar hmachhawn ka duh a, Spurs-ah khan la cham ila chuan season kua ka awmna tur a ni ang. A chang chuan chona thar hmachhawn turin nuam i tihna hmun aṭang pawha i thawhchhuah ve a ngaih chang a awm a ni," a ti.

English defender chuan Pep Guardiola vanga City zawm a nih thu sawiin, "Pep a hming ringawt hian engkim a hrilhfiah. Barcelona-ah Dani Alves leh player ṭha tak tak a enkawl a, Bayern Munich-ah Philipp Lahm a enkawl bawk. Pep-a'n min duh tih hriat khan hnar a harsa a ni," tiin khawvela right back ṭha ber ber lo enkawl tawhtu manager hnuaia khelh a chak tawh thu a sawi.