Harsatna karah Arsenal an chak

Arsenal-in season thar inbuatsaihna an neih mekah result ṭha an neih chhunzawm zel. Nilaini zan khan German champion Bayern Munich chu penalty shootout-ah 3-2 in an hneh.

Shanghai, China-a inkhelah Bayern tan striker Robert Lewan­dowski-a'n minute riatna lekah penalty aṭangin goal hmahruai a khung a, Bundesliga champion hi an chak tlang mai dawna a lan hnuah minute 93-naah Alex Iwobi chuan an siphurh sutin penalty shootout hmanga chak zawk zawn chhunzawm a ni.

Arsenal player ṭhen­khat chu an thil ei a fuh tawk loh avangin an dam lo a, striker Olivier Giroud chu khelmualah a kal ve thei lo. Inkhel ṭan hma darkar khat la awmah inkhel bul ṭan tur player hming 11 tarlan a ni a, Gunners captain Per Mertesacker hming pawh a tel. Mahse, Germany international hlui pawh hi dam lohna vangin a in­hnukdawk leh hnuhnawh.

Defender rinrawl Laurent Koscielny a inlan thei lo a, player pathum Sead Kolasinac, Aaron Ramsey leh Theo Walcott te chu dam lo chungin an inlan lui. Arsene Wenger-a'n tlarhnungah kum 19 mi Krystian Bielik, Kolasinac leh Nacho Monreal te a dintir, heti chung hian Bayern an chelh thei.

Bayern manager Carlo Ancelotti-a'n tlar­hmaah Lewandowski a nei a, a thlawp turin Thomas Muller, Franck Ribery leh Real Madrid aṭanga an lakluh James Rodriguez a nei bawk. Player langsar rual hmang chungin Arsenal goal-ah vawi khat bak an khung thei lo a, an hun ṭha neih tam zawk keeper Petr Cech-a'n a dan sak bawk.

Player ṭhenkhat dam loh chhan sawiin Gun­ners manager Wenger chuan, "Doctor chuan an eiturah thil fel lo a awm niin a ngai, kei chuan engthil nge an ei tak hi ka hrechiang lo," tiin a sawi.

Australia aṭanga China an pan chungchang sawi zuiin Wenger chuan, "Syd­ney kha chu a vawt em em a, kan hik a ni ber. Tunah erawh khaw lum zawng hi 36C a ni leh tawh, boruak inang lo taka kan insawn thut avang hian thil a awlsam lo deuh a ni," a ti.

Arsenal hian Inrinni tlaiaah Premier League champion Chelsea an hmachhawn leh dawn a, chumi hnuah Emirates Cup khel turin London-ah an kir ang. Anmahni siam inelnaah hian Benfica leh Sevilla an hmachhawn leh dawn a ni. An league match hmasa ber atan August 11, Zirtawpni zanah Leicester City an mikhual ang.