AFC U23 Qualifier Syria hmaah India an tlawm nghal

Nilaini zan khan India Under 23 chuan 2018 AFC U23 Championship qualifier match hmasa ber an khel a, Syria lak­ah 2-0 in an tlawm. India tan Hmun­hmelṭha tlangval Lal­ruatthara chu captain armband hreng chungin a inlan a, ram tana tournament a khelh hmasak bera captain a ni thei hi a chhuanawm hle.

India U23 tan hian rin­lawk ang ngeiin Mizo pathum Lalruatthara, Jerry Lalrin­zuala leh Daniel Lalhlimpuia ten inkhel bul an ṭan a, Lallianzuala Chhangte, Jerry Mawihmingthanga leh Sairuatkima te tan erawh hmun a awm rih lo.

Syria an ṭha

Inkhel ṭantir aṭangin Syria-in team ṭha zawk an ni tih an pholang a, minute 14-naah hun ṭha an nei nghal. Minute 24-naah India keeper Vishal Kaith kan hmuh chhunzawm nghal a, Pune City keeper hian India tlarhnung pherh zar zoin goal ngei tura ngaih ṭha takin a dang. Minute 34-naah Syria bawkin chance hlauhawm an nei a, mah se I League khelh zawh taka Shillong Lajong keeper Kaith tan hna harsa an siamsak lo.

India game-in ngai a awh chho ṭan a, Punjab striker ṭhangduang Manvir Singh leh Germanpreet Singh-ten hun ṭha a zawn zatin an nei - an beisei ber goal erawh hmuh tur a awm chuang lo. Ram pahnih player-ten goal khung an harsat a, goal awm loin chawlhlawk hman a ni.

A goal

Second half ṭan a nih hnuah India tan Nikhil Poojari a hmuhnawm a, East Bengal midfielder beiseiawm hi Syria rawlthar rual tan buaipui tham a ni. Santosh Trophy khelh zawh taka West Bengal tan a inlan avanga hriat hlawh Manvir-a'n minute 47-naah hun ṭhe nei mah se goal-ah a chantir thei lo chhunzawm a, India-in an tuar.

Captain Lalruatthara leh right back Nishu Kumar ten ṭul lo taka yellow card an hmuh hnu lawkah India-in goal an chhuah ta nge nge a, Bethlehem rawlthar Jerry leh keeper Vishal-te in man tawk loh zarah Rabie Srour chuan minute 64-naah goal hmahruai a khung. India-in an si phurh sut an tum luatah an che sual a, Mohamad Fares Arnaout chuan hun tawp nan minute hnih chiah a awm tawh tihin chak nemnghehna goal a khung.

Chhuanlam tur?

FIFA ranking-ah India hi 96-na an ni mek a, Syria hi tun hnaiah hmun ngaa tla hniamin 82-na an ni. Ranking aṭanga teh pawhin India hi Syria aiin an chhe zawk tih a chiang. India-in chhuanlam a siam fo ṭhin chu 'hmunhma' neih ṭhat tawk loh a ni a, mah se tuna Syria ram dinhmun ngaihtuahin 'hmunhma' neih ṭhat loh erawh chhuanlam atana hman chi a ni lo.

Syrian coach Hussein Afash-a'n AFC U23 khel tura tling ngei tura India an hmachhawn tur thu a sawi laiin India coach Stephen Constantine erawhin tlanchhe chungin, "Hma hun atana team din ṭhin ka ni a, kan tum ber chu senior team tana khel tlak player chher chhuah a ni," tiin a sawi daih thung!

An huaisen lo?

British coach Constantine-a'n India a enkawl tirha a

ṭawng­kam pawh 'nakin hun atana team din' tih tho a ni a, tunah Indian football fan-ten nghakhlel taka AFC U23 khelh hun an thlir laiin 'hma hun atan' tiin inkhelh hma aṭangin ṭawngkam a nei nghal a, he 'tlanchhe aw' hi fan-ten an hrethiam lo. Engtikah nge 'nakin' chu a thlen dawn? tih hi zawhna a ni.

Coach ber a huai loh miau avangin Indian rawlthar te khelmual chhungah an huaisen tawk lo tih hmuh turin a awm a, Syria rawlthar rual ten AFC U23 khelh ngei an duh laiin Indian player te zingah chutiang 'duhna' chu a awm lo em ni? tih chu zawhna pakhat a ni bawk.

Hmabak chu

India-in zanin 10:30-ah Qatar an hmachhawn lehnghal dawn a, chak loh a thiang tawh dawn lo. Blue Tigers (India sawina) hi Group C-ah Syria, Qatar leh Turkmenistan nen an awm ho a, group tina hmahruaitu zel hi 2018 AFC U23 Championship, China-a khelh tura tling tur an ni.

Group pakua aṭanga pa­hnihna zinga ti ṭha panga chu AFC U23 Championship khel turin an tling bawk ang. A tawi zawnga sawi chuan India-in an match hmasa bera Syria laka point khat pawh an hlawhchhuah loh avangin kalkawng a zim nghal sawt a, Syria aia ṭha zawk Qatar zanina an hmachhawn hunah tlawm a thiang tawh lo ang - an tlawm nawn a nih ngat chuan AFC U23 khelh beisei loh a fuh tawh zawk ang.

India vs Qatar

Qatar-in July-ah FIFA ran­king-ah hmu kuaa hmasawnin 79-na an ni a, India aia an san zawkna chu hmun 17 a ni. Kum 2022 World Cup thleng tur ram hi Asian football sawi a nih apianga hming lang hmasa ṭhin an ni bawk a, Qatar U23 lakah India U23 hi chak tura beisei an ni lo - mahse, chak an mamawh si!

AFC U23 qualifier-a India buaina chu ram dangin hman aṭang tawha team an din laiin India U23 erawh tun hnaia squad in din chawp an ni. Qatar squad-ah AFC U19 Championships khel tawh player 15 an awm laiin India erawh an nil a, AFC U16-ah Qatar player pathum inlan tawhin India-ah erawh panga chiah an awm a, FIFA World Cup U19-ah Qatar player 13 an awm tawh laiin India erawh age level-ah takngial pawh World Cup an la khel lo hrim hrim!